Uyghur aptonom rayonining mu'awin re'isi jarulla hisamidin wezipisidin qaldurulghan

Xitay metbu'atlirining 8-ayning 1-künidiki xewerlirige qarighanda, Uyghur aptonom rayonining mu'awin re'isi jarulla hisamidin wezipisidin qaldurulghan.

Xewerde, “Uyghur aptonom rayonluq xelq qurultiyi 13-nöwetlik da'imiy komitétining 34-qétimliq yighinida, aptonom rayonluq xelq hökümitining mu'awin re'isi jarulla hisamidinning wezipisidin istépa bérish telipi qobul qilindi” déyilgen. Aldinqi nöwetlik re'is shöhret zakir 2021-yil 10-ayda wezipisidin qaldurulghandimu, “Shinjang géziti” ning xewiride “Uyghur aptonom rayonluq xelq hökümitining re'isi shöhret zakirning istépanamisi testiqlandi” déyilgenidi.

Munasiwetlik uchurlargha qarighanda, jarulla hisamidin 1962-yil atushta tughulghan bolup, 1995-yil yopurgha nahiyesining hakimi, 2005-yil aqsu wilayitining waliysi, 2009-yil ürümchi shehirining bashliqi bolup wezipe ötigen. 2013-Yil 1-ayda Uyghur aptonom rayonining mu'awin re'isi bolup teyinlen'gen.

Radiyomizning ilgiriki xewerliride, jarulla hisamidinning xitay elchiliri bilen birlikte xitay hökümitining “Shinjang yaxshi jay” dégendek tor teshwiqat yighinlirigha hemde türkiye we rusiyede oquwatqan Uyghur oqughuchilarni ata-anisi bilen tor ékrani arqiliq körüshtürüsh yighinlirigha qatnashqanliqi xewer qilin'ghanidi. Jarulla hisamidin bu yighinlarda “Shinjangdiki her millet xelqi bextlik yashawatidu, chet eldiki junggogha qarshi küchler yalghan-yawidaq tarqitiwatidu” dégen.

Munasiwetlik uchurlardin melum bolushiche, bu qétim jarulla hisamidin bilen bir qatarda köpligen Uyghur emeldarlar wezipisidin qaldurulghan, beziliri yéngidin teyinlen'gen. Halbuki, bu hoquq almashturush qararida ismi élan qilin'ghanlar ichide mutleq köp qismi xitay emeldarliri bolup, tizimlikte eng yuqiri nisbetni igiligen.

Uyghur aptonom rayonining sabiq re'isi nur bekri qolgha élin'ghandin kéyin shöhret zakir, jarulla hisamidin'gha oxshash re'is, mu'awin re'is we bashqa Uyghur emeldarlarning qattiq bésimgha uchrighanliqi, her ishta xitay emeldarlirining éghzigha qaraydighanliqi, istépa sorash-sorimasliqinimu xitay emeldarlirining belgileydighanliqi ashkara mexpiyetlik idi. Amérikadiki xitay analizchisi chén pokung ilgiri bu heqte bergen bir ziyaritide, xitay hökümitining héchqandaq Uyghurgha ishenmeydighanliqini, ularning roli tügigende qattiq yaki yumshaq usullar bilen siyasiy sehnidin yoqitidighanliqini bildürgenidi.