Xitay da'iriliri 10-ayda Uyghur rayonidin 91 neper kadirning délosi bir terep qilin'ghanliqini élan qilghan

Yéqinqi birqanche yildin buyan xitay kompartiyesi memliket boyiche kadirlar sistémisini tazilashni we tertipke sélishni kücheytken. Bolupmu Uyghur rayonida “Merkezning 8 türlük belgilimisi” ge xilapliq qilghan dégen bahane bilen her derijilik kadirlargha bolghan nazaret we tazilashni mislisiz derijide kéngeytkenliki melum bolmaqta.

Xitayning bashqurushidiki “Tengritagh” tori, “Xelq tori” hemde “Bingtu'en xewerliri” torining bügün tarqatqan xewirige qarighanda, xitay da'iriliri 10-ay bir ay ichide Uyghur rayonida “Merkezning 8 türlük belgilimisige xilapliq qilghan” dégen jinayet bilen jem'iy 91 neper emeldarning délosini bir terep qilghan. Xewerde gerche bir terep qilin'ghan bu 91 neper kadirning millet teweliki tilgha élinmighan bolsimu, emma ularning ichide xéli köp qismining Uyghur we bashqa yerlik millet kadirliri ikenliki perez qilinmaqta. Xewerde yene bir terep qilin'ghan emeldarlar ichide 2 nepirining nazaret derijilik, 5 nepirining nahiye-bashqarma derijilik, qalghanlirining yéza we bölüm derijilik emeldarlar ikenliki tilgha élin'ghan.

Xitay hökümet taratqulirining bu hepte bergen xewerliride Uyghur aptonom rayonluq déhqanchiliq we yéza nazaritining naziri tursunjan elining “Tekshürüsh” ke élin'ghanliqi uqturulghan idi. Uyghur rayonining weziyitige yéqindin diqqet qilip kéliwatqan közetküchiler we siyasiy analizchilar, yéqinqi yillardin buyan Uyghur rayonida “Délo turghuzulup tekshürüshke élin'ghan” yaki “Bir terep qilin'ghan” Uyghur kadirlirining köpinchisining siyasiy seweblerdin tutqun qilin'ghanliqini, xitay emeldarlirining bolsa “Parixorluq” yaki “Chiriklik” sewebidin bir terep qiliniwatqanliqini ilgiri sürmekte. Közetküchilerning ilgiri sürüshiche, bu yil 10-ayda, yeni qisqighine bir ay ichide Uyghur rayonidin 91 neper emeldarning bir terep qilinishi, xitayning Uyghur rayonidiki yoquri bésimliq siyasiti we tazilash herikitining qaysiy derijige yétip barghanliqini éniq körsitip béridiken.