“Ikkini himaye qilish” chaqiriqi Uyghur diyaridiki siyasiy weziyetning kelgüsidin bésharet bermekte

Muxbirimiz eziz
2021.06.01

Uyghur diyaridiki siyasiy basturushning xaraktéri amérika qatarliq birqism dölet hökümetliri we parlaméntliri teripidin “Irqiy qirghinchiliq” dep békitilgendin kéyin xitay pütün dunyaning keskin tenqidige duch kelgenidi. Emma xitay hökümitining nöwettiki siyasiy basturush herikitini téximu keng kölemde dawam qilduridighanliqi türlük uchurlardin köplep melum bolmaqta.

“Tengritagh tori” ning 1-iyundiki xewiride éytilishiche, Uyghur aptonom rayonluq intizam tekshürüsh komitétining kéngeytilgen yighinida otturigha qoyulghan “Shi jinpingning üchinchi nöwetlik ‛shinjang xizmiti yighini‚da sözligen sözliri bundin kéyinki shinjang xizmitining bash qiblinamisidur” dégen pikir yighin ehlining birdek alqishigha érishken. Shuningdek buningdin kéyinki “Ikkini himaye qilish” xizmitide buni ijtima'iy muqimliq we menggülük eminlik yaritish xizmetliri bilen birlikte tewrenmey ijra qilish tekitlen'gen.

“Shi jinping rehberlikidiki kompartiyening yadroluq ornini himaye qilish we partiye merkiziy komitétining barche ishlargha rehberlik qilishini himaye qilish” tek bu chaqiriqqa qoshulghan yéngi mezmunlar nöwette Uyghur diyarida dawam qiliwatqan siyasiy basturushning yéngi sewiyege kötürülidighanliqidin bésharet, dep qariliwatqanliqi melum. Bolupmu Uyghur diyaridiki barliq Uyghur rehbiriy kadirlarning “Partiye intizamigha xilapliq qilish” dégen eyib bilen qolgha élinishi yéqinqi mezgillerdin buyan köplep melum bolghanidi. Amérika hökümitimu del mushu sewebtin chén chu'en'go bashliq xitay emeldarlargha émbargo élan qilghan hemde ularning qilmishini “Insaniyetke qarshi jinayet” dep xulasiligenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.