Даириләрниң уйғурларға қаратқан кийиниш чәклимиси қарамайда иҗра қилинишқа башлиди

Мухбиримиз меһрибан
2014-08-05
Елхәт
Пикир
Share
Принт

Қарамай даирилири дүшәнбә күни уқтуруш чиқирип, һөкүмәт тәрипидин чәкләнгән исламий йосунда кийингән 5 хил кишиләрниң 4-авғусттин башлап коча аптобуси қатарлиқ аммиви қатнаш васитилиригә чиқиши, аммиви сорунларға бериши чәкләнгәнликини уқтурған.

Чәтәл мәтбуатлиридин тунҗи болуп, фирансийә радиоси 4-авғуст қарамай шәһиридики уйғурларни зиярәт қилип, қарамайда уйғурларниң мусулманчә йосунда кийиниши чәкләнгәнликини хәвәр қилғандин кейин, сәйшәнбә күни нурғунлиған хәлқара мәтбуатларда, уйғурларға қаритилған кийиниш, йүрүш-туруш чәклимиси һәққидики хәвәр анализлири берилди. Әнглийә б б с агентлиқиниң сәйшәнбә күнидики хәвиридә «даириләрниң бу қилмиши уйғурлар учраватқан диний вә миллий өрп-адәт чәклимисиниң аллиқачан хәлқара кишилик һоқуқ әһдинамисидин һалқип, һәтта хитай һөкүмити өзи түзгән қануний бәлгилимиләрниму бузуш дәриҗисигә йәткәнликини көрситидиғанлиқи»ни тәкитлиди.

Уйғурларниң ислам динидики шәртләр бойичә мусулманчә кийиниши йеқинқи бирқанчә йиллардин буян чәклинип келиватқан болсиму, әмма даириләр бу һәқтә рәсмий қануни бәлгилимә чиқармиған иди.

28-Июл йәкән вәқәсидин кейин, уйғур аптоном район даирилири уйғурларниң диний пасондики кийинишигә қарита қануний бәлгилимә түзүп чәклимә қоюлғанлиқини уқтурған. Йеңидин чиқирилған бәлгилимидә, йүзигә чүмбәл тақиған аяллар, җилбаб кийгәнләр, исламий йосунда ошуқини йепип туридиған узун кәмзул кийгәнләр, кийимлиридә айюлтуз бәлгиси барлар, яш туруп қоюқ сақал қойғанлар қатарлиқ «5 хил кишиләр»ниң аммиви сорунларда йүрүши чәклинидиғанлиқи вә уларға қанун бойичә чарә көрүлидиғанлиқи уқтурулған.

Пикирләр (0)
Share
Толуқ бәт