Da'irilerning Uyghurlargha qaratqan kiyinish cheklimisi qaramayda ijra qilinishqa bashlidi

Muxbirimiz méhriban
2014-08-05
Share

Qaramay da'iriliri düshenbe küni uqturush chiqirip, hökümet teripidin cheklen'gen islamiy yosunda kiyin'gen 5 xil kishilerning 4-awghusttin bashlap kocha aptobusi qatarliq ammiwi qatnash wasitilirige chiqishi, ammiwi sorunlargha bérishi cheklen'genlikini uqturghan.

Chet'el metbu'atliridin tunji bolup, firansiye radi'osi 4-awghust qaramay shehiridiki Uyghurlarni ziyaret qilip, qaramayda Uyghurlarning musulmanche yosunda kiyinishi cheklen'genlikini xewer qilghandin kéyin, seyshenbe küni nurghunlighan xelq'ara metbu'atlarda, Uyghurlargha qaritilghan kiyinish, yürüsh-turush cheklimisi heqqidiki xewer analizliri bérildi. En'gliye b b s agéntliqining seyshenbe künidiki xewiride "Da'irilerning bu qilmishi Uyghurlar uchrawatqan diniy we milliy örp-adet cheklimisining alliqachan xelq'ara kishilik hoquq ehdinamisidin halqip, hetta xitay hökümiti özi tüzgen qanuniy belgilimilernimu buzush derijisige yetkenlikini körsitidighanliqi"ni tekitlidi.

Uyghurlarning islam dinidiki shertler boyiche musulmanche kiyinishi yéqinqi birqanche yillardin buyan cheklinip kéliwatqan bolsimu, emma da'iriler bu heqte resmiy qanuni belgilime chiqarmighan idi.

28-Iyul yeken weqesidin kéyin, Uyghur aptonom rayon da'iriliri Uyghurlarning diniy pasondiki kiyinishige qarita qanuniy belgilime tüzüp cheklime qoyulghanliqini uqturghan. Yéngidin chiqirilghan belgilimide, yüzige chümbel taqighan ayallar, jilbab kiygenler, islamiy yosunda oshuqini yépip turidighan uzun kemzul kiygenler, kiyimliride ayyultuz belgisi barlar, yash turup qoyuq saqal qoyghanlar qatarliq "5 Xil kishiler"ning ammiwi sorunlarda yürüshi cheklinidighanliqi we ulargha qanun boyiche chare körülidighanliqi uqturulghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet