Ma shingrüy Uyghur rayonida chong kölemlik kömür éléktir we kömür ximiye sana'iti tereqqiyatini tézlitishni telep qilghan

Dunyada kömürni yéqilghu qilishni toxtitip, hawagha zeherlik karbon qoyup bérishni kontrol qilish sadaliri küchiyiwatqan bir waqitta, Uyghur aptonom rayonluq partkom sékrétari ma shingrüy Uyghur rayonida chong kölemlik, yuqiri süpetlik kömür éléktir we kömür ximiye sana'iti tereqqiyatini tézlitishni telep qilghan. Xitay taratqulirining xewer qilishiche, ma shingrüy bu yil 3-yanwar küni xitayning eng chong kömür éléktir we kömür ximiye sana'iti baziliridin biri bolghan sherqiy jungghar iqtisadiy échiwétish rayonida tekshürüshte bolghanda bu telepni otturigha qoyghan.

Ma shingrüyning 3-yanwar sherqiy jungghardiki kömür sana'iti karxanilirida élip barghan tekshürüshi, uning 31-dékabir küni bayin'gholin oblasti we aqsu wilayitidiki xitay énérgiye we yéngi matériyallar karxanilirida tekshürüshte bolushining arqisidinla élip bérilghan.

 “Shinjang géziti” ning xewer qilishiche, ma shingrüy sherqiy jungghar iqtisadiy échiwétish rayonida tekshürüshte bolghanda mundaq dégen: “Shinjangning nuqtiliq tebi'iy bayliqi we sana'itining pütün memliket iqtisadidiki muhim rolini téximu jari qildurup, kömürning köp tereplimilik ishlitilishini tézlitip, döletning chong kölemdiki kömürchilik, kömür éléktir we kömür ximiye sana'iti ul qurulushini yuqiri süpette algha sürüsh kérek” . Uning tekitlishiche, bu arqiliq rayonda “Pütün döletning énérgiye bayliqi istratégiyesige kapaletlik qilish bazisi berpa qilish kérek” iken.

Ma shingrüyning néme üchün 31-dékabirdin béri Uyghur rayonidiki énérgiye baziliri we karxanilirida arqa-arqidin tekshürüshte bolup, énérgiye qurulushini yuqiri süpette algha sürüsh heqqide yolyoruqlarni bérishining sewebi melum emes. Melum bolushiche, xitay yéqinqi ikki yildin béri, Uyghur mejburiy emgek küchliri yighilghan nuqtiliq sahelerdin rayonning tokluq aptomobil bataréyesi we küntaxta matériyalliri ishlepchiqirishigha nurghun meblegh salghan bolsimu, yéqinqi bir nechche aydin béri bu matériyallarning bahasi qattiq chüshüp kétip, mehsulat éhtiyajdin artip kétishtek mesilige duch kelgen.