Уйғурларниң қору-җай мәдәнийити сиясий контроллуқниң васитисигә айланмақта

Мухбиримиз әзиз
2020-08-12
Share

Өткән йиллардин буян давам қиливатқан уйғур мәдәнийитини йоқитиш сиясий долқунида хитай һөкүмити уйғурларниң олтурақ макан бошлуқини өзгәртишни бир түрлүк муһим мәзмун қилип кәлгән иди. «Ақсу ахбарат тори» ниң 12-авғусттики хәвиридә уйғурларниң қору-җай мәдәнийитиниң нөвәттики сиясий контроллуқниң бир муһим васитиси болуп қалғанлиқи тилға елинған.

Хәвәрдә ейтилишичә, ақсуниң онсу наһийәсигә қарашлиқ һәрқайси кәнтләрдики қору-җайлар «ячейка қоруси», «бейитиш қоруси» вә «бәхт қоруси» намида гуруппиларға айрилған болуп, буларда «мулазимәт көзники» намида мәхсус көзитиш орунлири тәсис қилинған. Буниң билән шу қорудики кишиләрниң карта вә кинишкисини тәкшүрүштәк илгирики кона усул техиму мукәммәлләшкән. Шуниңдәк «ячейка қоруси» арқилиқ шу қорудики уйғурларниң барлиқ турмуш, хизмәт, тиҗарәт, тирикчилик дегәндәк пүтүн ишлириға «компартийә биваситә йетәкчилик» қилидиған вә «мәслиһәт беридиған» йеңичә тәртипни орнитип чиққан.

Хәвәрдә алаһидә тилға елинған «бәхт қоруси» да яшинип қалған кишиләр «күтүнүш мәсилилирини яхши һәл қилиш» намида бир қоруға топланған болуп, бәзи анализчилар «булар пәрзәнтлири аилә бойичә лагерларға қамалған һәмдә игә-чақисиз қалған кишиләр болуши еһтималға наһайити йеқин» дәп қаримақта.

Америкадики мустәқил анализчи елшат һәсән бу һәқтә тохтилип, буниң хитай һөкүмити иҗра қиливатқан уйғурларниң һаятлиқ муһитини өзгәртиш пиланиниң бир қисми икәнликини, буниң намда «бәхт қоруси» дегәндәк чирайлиқ намлар билән аталсиму, әмәлийәттә лагер сиртида туруватқан кишиләрни қоруларға топлап, техиму үнүмлүк вә толуқ контроллуқ астиға елишни көзлигән лайиһә икәнликини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт