Uyghurlarning qoru-jay medeniyiti siyasiy kontrolluqning wasitisige aylanmaqta

Muxbirimiz eziz
2020-08-12
Élxet
Pikir
Share
Print

Ötken yillardin buyan dawam qiliwatqan Uyghur medeniyitini yoqitish siyasiy dolqunida xitay hökümiti Uyghurlarning olturaq makan boshluqini özgertishni bir türlük muhim mezmun qilip kelgen idi. "Aqsu axbarat tori" ning 12-awghusttiki xewiride Uyghurlarning qoru-jay medeniyitining nöwettiki siyasiy kontrolluqning bir muhim wasitisi bolup qalghanliqi tilgha élin'ghan.

Xewerde éytilishiche, aqsuning onsu nahiyesige qarashliq herqaysi kentlerdiki qoru-jaylar "Yachéyka qorusi", "Béyitish qorusi" we "Bext qorusi" namida guruppilargha ayrilghan bolup, bularda "Mulazimet közniki" namida mexsus közitish orunliri tesis qilin'ghan. Buning bilen shu qorudiki kishilerning karta we kinishkisini tekshürüshtek ilgiriki kona usul téximu mukemmelleshken. Shuningdek "Yachéyka qorusi" arqiliq shu qorudiki Uyghurlarning barliq turmush, xizmet, tijaret, tirikchilik dégendek pütün ishlirigha "Kompartiye biwasite yétekchilik" qilidighan we "Meslihet béridighan" yéngiche tertipni ornitip chiqqan.

Xewerde alahide tilgha élin'ghan "Bext qorusi" da yashinip qalghan kishiler "Kütünüsh mesililirini yaxshi hel qilish" namida bir qorugha toplan'ghan bolup, bezi analizchilar "Bular perzentliri a'ile boyiche lagérlargha qamalghan hemde ige-chaqisiz qalghan kishiler bolushi éhtimalgha nahayiti yéqin" dep qarimaqta.

Amérikadiki musteqil analizchi élshat hesen bu heqte toxtilip, buning xitay hökümiti ijra qiliwatqan Uyghurlarning hayatliq muhitini özgertish pilanining bir qismi ikenlikini, buning namda "Bext qorusi" dégendek chirayliq namlar bilen atalsimu, emeliyette lagér sirtida turuwatqan kishilerni qorulargha toplap, téximu ünümlük we toluq kontrolluq astigha élishni közligen layihe ikenlikini bildürdi.

Toluq bet