«Хәлқаралиқ аммиви радийоси» да уйғур миллий мәдәнийити учраватқан хирислар тонуштурулди

Мухбиримиз ирадә
2020-08-13
Елхәт
Пикир
Share
Принт

Америкадики нопузлуқ ахбарат органлиридин болған «хәлқаралиқ аммиви радийоси» 12-авғуст күнидики дуня хәвәрлири сәһиписидә уйғур мәсилисигә алаһидә орун бәрди.

Программида хитайниң лагерлириға қамалған нахшичи аблаҗан аюп, кийим-кечәк модели мәрдан ғаппар қатарлиқлар мисал қилиниш арқилиқ хитай һөкүмитиниң уйғурларға қаратқан тутқун қилиш көлиминиң интайин кәң даиригә созулғанлиқи йорутуп берилгән.

Радийо программиси үчүн фирансийәдә яшайдиған уйғур сәнәткар, филим ишлигүчи муқәддәс миҗит зиярәт қилинған болуп, у сөзидә юқирида тутқун қилинған сәнәткарларниң гунаһсизлиқини, җүмлидин уларниң хитайниң «қизил сизиқлири» ни чоңқур һес қилған вә шу сизиқтин атлап өтмәсликкә диққәт қилған асаста өзиниң сәнити билән шуғулланған кишиләр икәнликини ипадә қилған. У мундақ дегән: «мана мушуниңдин биз хитай һакимийитиниң барлиқ уйғурларни нишанға алғанлиқини чүшинәләймиз.»

«Хәлқаралиқ аммиви радийоси» аңлитишида хитай һөкүмитиниң 2009-йилидики «5-июл үрүмчи вәқәси» дин кейин районни тәдриҗий һалда һәрбийләштүргәнлики вә ақивәттә милйонлиған кишини лагерларға қамиғанлиқи, уйғур миллий мәдәнийтииниң тошуғучилири һазир лагерларда яки қаттиқ бесим астида болғанлиқтин, уйғур кимликиниң йоқилиш гирдабиға дуч келиватқанлиқини баян қилған.

Уйғур кишилик һоқуқ қурулушиниң тәтқиқатчиси әлис андерсон программида қилған сөзидә «уйғурларниң һазирқи вәзийити пәвқуладдә еғир болғанлиқи үчүн, чәтәлләрдә яшаватқан уйғурларниң уйғур ана тилини, уйғур мәдәнийитини сақлап қелиштин ибарәт тәқәззасиниңмү интайин күчлүк болуватқанлиқини» билдүргән.

Бирақ әлис ханим йәнә уйғур миллий мәдәнийитини қоғдап қелиш үчүн чәтәлләрдә көрситиливатқан тиришчанлиқлар йетәрлик иқтисадий қоллаш болмиғанлиқтин өз ролини толуқ җари қилдуралмайватқанлиқини ейтқан.

Муқәддәс миҗит ханим болса бир мәдәнийәт тәрәққий қилғандила андин давам қилидиғанлиқини тәкитлигән вә уйғур миллий мәдәнийитини яшитидиған, яшнитидиған асаслиқ мәдәнийәт тошуғучилири лагерларда чирип кетиватқан бир шараитта, уни чәтәлләрдики аз сандики уйғурлар арқилиқ давам қилдурушниң наһайити зор бир риқабәт икәнликини әскәрткән. У йәнә мушу баянлири арқилиқ уйғурларниң миллий мәвҗутлуқи учраватқан хәвпниң қанчилик зорлуқини йорутуп бәргән.

Пикирләр (0)
Share
Толуқ бәт