Америка таможна вә чегра қоғдаш идарисидин уйғур елидин киргән мәһсулатларни тәкшүрүш тәләп қилинди

Мухбиримиз ирадә
2019-11-05
Елхәт
Пикир
Share
Принт

Америка дөләт мәҗлис әзалири вә шуниңдәк америка дөләт мәҗлиси қармиқидики хитай ишлири иҗраийә комитети рәислири марко рубийо вә җәймис макговрн 5-ноябир күни америка таможна вә чегра қоғдаш идарисиниң иҗраийә рәиси марк морганға рәсмий мәктуп йоллап, униңдин американиң мәвҗут қанунлириға асасән шинҗаң уйғур аптоном районида мәҗбурий әмгәк асасида ишләп чиқирилған малларниң америкаға киришини тосуш вә тәкшүрүш елип беришни тәләп қилған.

Хитай ишлири иҗраийә комитети тәрипидин елан қилинған бу баянаттин қариғанда, юқиридики бу мәктуп америка дөләт мәҗлисидә чақирилған «уйғур дияридики мәҗбурий әмгәк» темилиқ гуваһлиқ бериш йиғининиң хуласисигә асасән йезилған. Баянатта уйғур елидә ишләп чиқирилған мәһсулатларда мәҗбурий әмгәк барлиқи һәққидә ишәнчлик пакитлар барлиқи вә бу мәһсулатларниң америка базириға киришиниң америкадики мәвҗут қанунларға хилап болидиғанлиқи тәкитләнгән.

Сенатор марко рубийо вә җәймис макговрнлар америка таможна вә чегра қоғдаш идарисиниң иҗраийә рәиси марк морганға язған хетидә уларниң йеқинда хотән тәйда ширкитигә аит мәһсулатларни чеграда тутуп қалғанлиқини тәбриклигән вә шундақла марк морган әпәндидин: «бу һәқтики тәдбирләрни йәниму чиңитип, уйғур елидин киргән тоқумичилиқ вә башқа мәһсулатларға қарита омумйүзлүк ‹тохтитип қоюш буйруқи' чиқириш арқилиқ, америка истемалчилириниң шинҗаң уйғур аптоном районида ‹инсанийәткә қарши җинайәт' дәп қариливатқан бир милйондин ошуқ уйғур вә башқа аз санлиқ милләтләрниң тутқун қилиниши вә райондики кәң көләмлик назарәт һәрикитигә һәмдәмдә болуп қалмаслиқиға капаләтлик қилишини үмид қилимиз» дәп тәләп қилған.

Пикирләр (0)
Share
Толуқ бәт