Amérika tamozhna we chégra qoghdash idarisidin Uyghur élidin kirgen mehsulatlarni tekshürüsh telep qilindi

Muxbirimiz irade
2019-11-05
Élxet
Pikir
Share
Print

Amérika dölet mejlis ezaliri we shuningdek amérika dölet mejlisi qarmiqidiki xitay ishliri ijra'iye komitéti re'isliri marko rubiyo we jeymis makgowrn 5-noyabir küni amérika tamozhna we chégra qoghdash idarisining ijra'iye re'isi mark morgan'gha resmiy mektup yollap, uningdin amérikaning mewjut qanunlirigha asasen shinjang Uyghur aptonom rayonida mejburiy emgek asasida ishlep chiqirilghan mallarning amérikagha kirishini tosush we tekshürüsh élip bérishni telep qilghan.

Xitay ishliri ijra'iye komitéti teripidin élan qilin'ghan bu bayanattin qarighanda, yuqiridiki bu mektup amérika dölet mejliside chaqirilghan "Uyghur diyaridiki mejburiy emgek" témiliq guwahliq bérish yighinining xulasisige asasen yézilghan. Bayanatta Uyghur élide ishlep chiqirilghan mehsulatlarda mejburiy emgek barliqi heqqide ishenchlik pakitlar barliqi we bu mehsulatlarning amérika bazirigha kirishining amérikadiki mewjut qanunlargha xilap bolidighanliqi tekitlen'gen.

Sénator marko rubiyo we jeymis makgowrnlar amérika tamozhna we chégra qoghdash idarisining ijra'iye re'isi mark morgan'gha yazghan xétide ularning yéqinda xoten teyda shirkitige a'it mehsulatlarni chégrada tutup qalghanliqini tebrikligen we shundaqla mark morgan ependidin: "Bu heqtiki tedbirlerni yenimu chingitip, Uyghur élidin kirgen toqumichiliq we bashqa mehsulatlargha qarita omumyüzlük 'toxtitip qoyush buyruqi' chiqirish arqiliq, amérika istémalchilirining shinjang Uyghur aptonom rayonida 'insaniyetke qarshi jinayet' dep qariliwatqan bir milyondin oshuq Uyghur we bashqa az sanliq milletlerning tutqun qilinishi we rayondiki keng kölemlik nazaret herikitige hemdemde bolup qalmasliqigha kapaletlik qilishini ümid qilimiz" dep telep qilghan.

Toluq bet