“Uyghur mejburiy emgikining aldini élish qanuni” gha munasiwetlik tor muhakime yighinliri dawamlashmaqta

Amérika fédératsiye organliri 11-ayning 12-küni Uyghur mejburiy emgiki we déngiz mehsulatliri sahesidiki mejburiy emgek témisida tor muhakime yighini achti.

Amérika tamozhna we chégra qoghdash idarisining tor bétidiki uchurlardin qarighanda, bu muhakime yighini Uyghur mejburiy emgiki we déngiz mehsulatliri sahesidiki mejburiy emgek heqqide ötküzülgen tor muhakime yighinlirining ikkinchisi bolup, birinchi yighin 11-ayning 5-ötküzülgen. U yighinda tashqi soda qanunigha xilapliq qilish weqeliri heqqidiki doklat asasiy téma qilin'ghan. 12-Noyabirda ötküzülgen bu yighinda bolsa, “Uyghur mejburiy emgikining aldini élish qanuni” we bu qanun boyiche tizimlikke élin'ghan shirketler asasiy téma qilindi.

Bu bir yürüsh tor muhakime yighini amérika déngiz mehsulatliri sahesidikilerge “Uyghur mejburiy emgikining aldini élish qanuni” gha xilapliq qilish ehwalini chüshendürüsh we hökümetning buni tosush tirishchanliqini bildürüsh üchün ötküzülgen bolup, uninggha amérika weten xewpsizliki ministirliqi siyaset ishxanisi, tamozhna we chégra qoghdash idarisi (CBP), emgek ministirliqi, tashqi ishlar ministirliqi qatarliq orunlarning xadimliri qatnishidiken.

12-Noyabir, “Déngiz mehsulatliri bayliqi” torida élan qilin'ghan xewerde déyilishiche, 2024-yil 7-ayda amérika weten xewpsizliki ministirliqi (DHS) qarmiqidiki amérika Uyghur mejburiy emgikining aldini élish xizmet guruppisi “Uyghur mejburiy emgikining aldini élish qanun layihesi istratégiyesi” ni yéngilighan bolup, xitaydin kiriwatqan alyumin, xilorid, polinil sana'iti mehsulatliridin bashqa yene, déngiz mehsulatliri sahesigimu mejburiy emgek cheklimisi qoyghan. Buning bilen, mejburiy emgekni cheklesh qanuni boyiche qara tizimlikke kirgen xitay shirketlirining sani köpeygen.