Kishilik hoquq közitish teshkilati: "Bashqa döletler türkiyedek Uyghurlarni qoghdishi kérek"

Muxbirimiz erkin
2019-02-11
Élxet
Pikir
Share
Print

Kishilik hoquqni közitish teshkilati 10‏-féwral türkiye hökümitining Uyghurlar heqqidiki bayanatigha yüksek baha bérip, bashqa döletlerning Uyghurlarni türkiyedek qoghdishi kéreklikini bildürgen.

Anatoliye agéntliqining xewer qilishiche, kishilik hoquqni közitish teshkilatining bashliqi kénnis rus 10‏-féwral twitirda türkiyening Uyghurlar heqqidiki bayanatigha inkas bildürgen.

U buning nahayiti zor weqe ikenlikini eskertip: "Türkiye xitayning Uyghur musulmanlirigha qaratqan qorqunchluq qilmishini tenqid qilghan musulmanlar köp sanliqtiki tunji we eng küchlük döletlerning biri" dégen.

Türkiye tashqi ishlar ministirliqi 9‏-féwral küchlük bayanat élan qilip, xitay hökümitining Uyghur rayonidiki kishilik hoquq depsendichilikini qattiq tenqid qilghan shuningdek xitayni lagérlarni taqashqa chaqirip, b d t we xelq'ara jem'iyetni bu ishqa arilishishqa ündigen.

Bayanatta yene ataqliq muzikant abduréhim héytning wapat bolghanliqigha da'ir xewerlerdin chöchügenliki bildürülgen. Lékin xitay hökümiti 10‏-féwral abduréhim héytning hayat ikenlikige a'it widiyoni élan qilip, türkiyening tenqidlirini ret qilghan bolsimu, emma bu widiyo Uyghur serxillirining teqdiri heqqide téximu chong ghulghula qozghighan idi.

Kénnis rus bayanatida, türkiyening "Shinjangdiki tragédiye insaniyet üchün bir nomus" dégenlikige yüksek baha bérip, "Türkiyening (Uyghurlarning) jaza merkezliride we türmilerde ten jazasi hem ménge yuyushqa mehkum boluwatqanliqini bayqighanliqi" ni bildürgen.

Uning ilgiri sürüshiche, "Kéyinki qedemde b d t kishilik hoquq kéngishi xitayning shinjangdiki Uyghur we bashqa musulmanlargha séliwatqan zulumigha qarita tekshürüsh élip bérishi kérek" iken.

Türkiye tashqi ishlar ministirliqining 9‏-féwral élan qilghan bayanati xelq'arada zor ghulghula qozghidi.

Mezkur bayanat, türkiyeni Uyghur rayonidiki kishilik hoquq depsendichilikige köz yumush bilen eyiblep kéliwatqan Uyghurlargha, kishilik hoquq teshkilatlirigha ümid béghishlighan.

Toluq bet