Bérkéliy uniwérsitétida Uyghurlar mesilisi tonushturuldi

• Muxbirimiz eziz
  2019-03-06

6-Mart küni chüshtin kéyin amérikidiki eng dangliq aliy mekteplerdin bolghan kaliforniye uniwérsitétining bérkéliy shöbiside “Xitaydiki Uyghur krizisi” témisida doklat bérish yighini ötküzüldi.

Amérikidiki Uyghur siyasiy pa'aliyetchi roshen abbas we yétiliwatqan Uyghurshunas darén baylér ayrim-ayrim halda Uyghurlarning hazirqi ehwali, xitay hökümitining Uyghurlarni siyasiy, iqtisad, medeniyet jehetlerde qandaq basturuwatqanliqi heqqide chüshenche berdi.

Roshen abbas yighindin kéyin bu heqte melumat bérip, özining nuqtiliq halda xitay hökümiti ijra qiliwatqan basturushning muhajirettiki Uyghur ösmürlirige we Uyghur jama'itige maddiy we rohiy jehettin qandaq buzghunchiliqlarni élip kelgenlikini emeliy misallar arqiliq bayan qilghanliqini sözlep berdi.

Doktor darrén baylér özining yéqinqi mezgillerdiki izdinishlirige asasen Uyghur diyaridiki zor böhranning medeniyet we sen'et sahesidiki ehwalini, Uyghur ziyaliylarning zor sanda lagérlargha qamilishi qatarliq ehwallarni yighin ehlige tonushturghan.

Yighin jeryanida ular herqaysi jaylardiki ilmiy xadimlarni, jümlidin bérkéliy uniwérsitétidiki oqutquchi we oqughuchilarni Uyghurlar duch kéliwatqan ijtima'iy böhran'gha qarita qolidin kélishiche yardemde bolushqa chaqirghan.

Melum bolushiche, bu qétimqi yighinni bérkéliy uniwérsitéti qarmiqidiki “Kishilik hoquq merkizi” orunlashturghan bolup, bu Uyghur jem'iyiti duch kéliwatqan siyasiy böhranni amérikidiki ilmiy sahege anglitishta otturigha chiqqan yene bir tirishchanliq hésablinidiken. Nöwette buning Uyghur dawasini téximu köp amérikiliqlargha bildürüshte zor ehmiyiti barliqi mölcherlenmekte.