LIGB Йиғинида уйғур районидики йиғивелиш лагерлириниң «бир йол бир бәлбағ» билән алақиси оттуриға қоюлған

Мухбиримиз шөһрәт һошур
2019-04-03
Елхәт
Пикир
Share
Принт

Лондондики LIGB , йәни «хәлқара әркинлик-британийә шөбиси» ниң тор бетидин мәлум болушичә, 2‏-април күни мәзкур тәшкилат тәрипидин «хитай вә уйғур мәсилиси» дегән темида муһакимә йиғини ечилған.


Йиғинда районниң өтмүши вә бүгүни һәққидә мәлуматлар сунулған. Мәлум болушичә, йиғинда уйғур райониниң хитайниң чиң сулалиси дәвридин тартип, пәқәт хитай һакимийити күчләнгән мәзгиллардила хитайға беқинип вә башқурулуп кәлгәнлики әскәртилгән. Райондики ахирқи истиланиң хитай компартийәси һакимийәт бешиға чиққандин кейин башланғанлиқи тилға елинған бу йиғинда 1950 йиллардин кейин районға кәң көләмдә пиланлиқ нопус йөткәш елип берилип, уйғурларниң райондики нопус үстүнликиниң бузулғанлиқи тәкитләнгән.


Йиғинда йәнә еғир  зулум сәвәбидин районда үзлүксиз наразилиқ намайишлири вә исянлар көтөрүлгәнлики, буниң ичидә бәзи қаршилиқ һәрикәтлириниң зорванлиқ түсидә давам қилғанлиқи, хитайниң буни баһанә қилип туруп, «муқимлиқ» тәдбирлири сүптидә йиғивелиш лагерлири тәсис қилғанлиқи вә бу лагерларда 250 миң билән 2 милйон арилиқидики кишиләрниң соланғанлиқи тилға елинған. Лагерларниң «терорлуққа қарши туруш» нами астида қурулғанлиқи, әмәлийәттә буниң ши җинпиңниң «бир йол бир бәлбағ» пиланини оңшулуқ әмәлгә ашуруш үчүн тәсис қилинғанлиқи, бу лагерларда тутқунларни диний етиқадтин узақлаштуруш вә компартийәгә мәдһийә оқушқа мәҗбурлаватқанлиқи оттуриға қоюлған. Тордики мәзкур йиғин уқтурушидин мәлум болушичә, бу йиғинда рачел һаррис, рәһимә мәхмут қатарлиқ бәш нәпәр мутәхәссис вә паалийәтчи сөз қилған.


Пикирләр (0)
Share
Толуқ бәт