Gollandiye zhurnili Uyghurshunas timuti grosning Uyghurlar heqqidiki bir kitabqa yazghan obzorini sénzor qilghan

Muxbirimiz erkin
2019-05-13
Élxet
Pikir
Share
Print

Gollandiye brill neshriyatigha qarashliq "Xitay we asiya" zhurnilining amérikaliq Uyghurshunas timuti grosning Uyghurlar heqqidiki bir kitabqa yazghan obzorini sénzorlighanliqi ashkarilandi.

Timuti grosning 13‏-may "Xitay qanili" namliq torida ashkarilishiche, "Asiya we xitay" zhurnili 2018‏-yili 1‏-ayda uninggha awstraliye dölet uniwérsitétining tetqiqatchisi tam klifning xitay köchmenlirining Uyghur rayonidiki kechmishige da'ir "Néfit we su" namliq kitabigha obzor yézishni hawale qilghan. Timuti gros shu yili 11‏-ayda obzorni yézip püttürüp, zhurnalgha tapshurghan bolsimu, lékin zhurnalning obzor sehipisige mes'ul tehriri maqaligha qarita azraq tüzitish élip bérishni tekitlep, obzorning Uyghur rayoni weziyitige da'ir birinchi paragrafi bilen ikkinchi paragrafini késiwetken.

Timuti grosning ilgiri sürüshiche, uning bu obzorini yazghan mezgili del xitayning Uyghur rayonida Uyghurlarni keng kölemlik tutqun qilip, "Qayta-terbiyelesh lagérliri" gha qamawatqan waqtigha toghra kelgen. U obzorining béshida shu waqittiki weziyetni tonushturghan. Timuti gros, xitayning Uyghurlarni "Merkezleshtürülgen qayta terbiyelesh lagérliri" gha keng kölemde qamap, sherqtiki xitay ölkilirige qarighanda perqliq radikal tedbirlerni yolgha qoyuwatqanliqini ilgiri sürgen. Uning "Xitay qanili" toridiki maqaliside qeyt qilinishiche, u maqalisining sénzor qilinishigha naraziliq bildürüp, buning sewebini sorighan bolsimu, lékin zhurnal tehrirati buning konkrét sewebini chüshendürmigen. Peqet uning bu yil 4‏-ayda bu weqeni twétirda élan qilishi ghulghula qozghighandin kéyinla brill neshriyati uning bilen alaqiliship, uning obzorining sénzorlinishigha "Obzorda zhurnalning munasiwet da'irisi sirtigha chiqip, qutratquchi qarashlarning ipadilinishidek semimiy xataliq" ning seweb bolghanliqini ilgiri sürgen. Lékin, timuti grosning qeyt qilishiche, uning obzorining sénzorlinishi "Semimiy xataliq" bilen munasiwetsizken. U, xongkong sana'et uniwérsitétining proféssori xen shawrong bu zhurnalning bash muherriri ikenliki, uning obzorining sénzorlinishining shuning bilen munasiwetlik ikenlikini bildürgen. Uning ilgiri sürüshiche, xen shawrong ilgiri xongkongdiki "Dagongbaw" gézitide maqale élan qilip, "Gherb we musulman dunyasining tesiri Uyghur rayonida muqimsizliq peyda qiliwatqan 6 amilning biri" dégen iken.

Toluq bet