Амал клоней уйғурларни дәпсәндә қилишқа қатнашқан ширкәт вә шәхсләрни җавабкарлиққа тартишни тәләп қилған

Мухбиримиз әркин
2020-05-15
Елхәт
Пикир
Share
Принт

Америкалиқ кишилик һоқуқ адвокати, атақлиқ кино чолпини җорҗи клонейниң аяли амал клоней 15-май күни австралийә парламентида гуваһлиқ берип, австралийәниң қанун чиқирип, уйғурларниң кишилик һоқуқни дәпсәндә қилишқа қатнишиватқан ширкәт вә шәхсләрни җавабкарлиққа тартишни тәләп қилған. Униң тәкитлишичә, австралийә өзиниң магнитиский кишилик һоқуқ қанунини мақуллап, кишилик һоқуқ күшәндилиригә тақабил туруши керәк икән.

«Сидней әтигәнлик хәвәрчиси» гезитиниң хәвәр қилишичә, амал клоней австралийә парламентиға видейо арқилиқ бәргән гуваһлиқ сөзидә, «австралийә һөкүмитиниң кишилик һоқуқни дәпсәндә қилишқа четишлиқ барлиқ ширкәтләрни нишанға елиши, бу, хитай һөкүмитиниң шинҗаңдики бир йерим милйондәк уйғур қамалған йиғивелиш лагерлириниму өз ичигә елиши керәклики» ни тәкитлигән.

У ширкәтләрниң ишниң җиддийитигә қарап һәрикәт қилидиғанлиқи, нөвәттә уларниң кишилик һоқуқ дәпсәндичиликигә четилишини тосидиған йетәрлик чәкләш тәдбириниң йоқлуқини билдүрүп; «чиқирилғуси қанунда австралийә һөкүмитиниң шинҗаңдики кишилик һоқуқ дәпсәндичиликигә четишлиқ ширкәт вә шәхсләрни җавабкарлиққа тартишиға йол қоюлса, буниң иҗабий роли болиду» дегән. Мәлум болушичә, нөвәттә австралийә һөкүмити америкадин үлгә елип, шуниңкигә охшаш бир қанун чиқириш һәққидә пикир елишни башливәткән.

Пикирләр (0)
Share
Толуқ бәт