Американиң иттипақдашлири уйғур дияридики тәкшүрүшниң дәхлисиз болушини тәкитлиди

Мухбиримиз әзиз
2021-06-01
Share

Хитай һөкүмитиниң уйғур дияридики ирқий қирғинчилиқи хәлқаралиқ қизиқ темилардин болуватқанда американиң иттипақдашлири ғәрб дунясиниң мустәқил тәкшүрүш гуруппилириға уйғур диярида чәклимисиз вә шәртсз тәкшүрүш һоқуқи берилишни йәнә бир қетим қаттиқ тәкитлиди.

"бломберг хәвәрлири" ториниң 31-майдики хәвиридә ейтилишичә, америка билән йеқин иттипақдашлиқ мунасивитидә болуватқан австралийә вә йеңи зеландийә һөкүмәтлири уйғурлар дуч келиватқан нөвәттики сиясий бастурушниң һәқиқий әһвалини хитай ахбаратлиридин әмәс, бәлки нәқ мәйдан тәкшүрүши арқилиқ игиләшни тәләп қилишқа башлиған. Болупму австралийә баш министири скот моррисон вә йеңи зеландийәниң баш министири җейсинда ардерн дүшәнбә күни бирләшмә баянат елан қилип: "хитай һөкүмити һазир кишилик һоқуқ мәсилилири бойичә еғир әндишиләргә сәвәб болуватқан шинҗаң райониға бирләшкән дөләтләр тәшкилати (б д т) вә башқа гуруппиларниң тосқунсиз вә шәртсиз киришигә рухсәт қилиши лазим" дәп көрсәтти.

Хәвәрдә ейтилишичә, уларниң бу тәлипи хитай һөкүмитиниң йеқинқи мәзгилләрдә көп тәкрарланған "биз чәтәл ахбарат васитилириниң вә тәкшүргүчилириниң шинҗаңға берип тәкшүрүп көрүшини қизғин қарши алимиз" дегән баянатиға қарита ейтилғаникән. Болупму хитай һөкүмити ғәрб ахбарат васитилириниң "милйончә уйғур йиғивелиш лагерлириға қамалған" дегән мәзмундики хәвәрлирини инкар қилишқа башлиғандин буян бу баянатни көп қетим тәкитлигән икән. Әмма һәрқетим чәтәл тәкшүрүш өмәклириниң бу һәқтики тәлипини тапшурувалғанда буниңға бир қатар шәртләрни қоюп, өзлири бекитип бәргән җайларни тәкшүрүши лазимлиқини билдүрүп кәлгән. Бу әһвал болса изчил түрлүк гуманларға сәвәб болуп кәлгәниди. "кишилик һоқуқни көзитиш тәшкилати" 2021-йили 19-апрелда елан қилған уйғурлар һәққидики мәхсус доклаттиму бу мәсилә алаһидә тилға елинип "хитай һөкүмитиниң чәтәл тәкшүрүш өмәклиригә һәр хил тосқунлуқларни пәйда қилиши бу тосқунларниң арқисиға немиләрниң йошурунғанлиқи һәққидики түрлүк соалларға сәвәб болмақта" дәп көрситилгәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт