Amérikaning ittipaqdashliri Uyghur diyaridiki tekshürüshning dexlisiz bolushini tekitlidi

Muxbirimiz eziz
2021-06-01
Share

Xitay hökümitining Uyghur diyaridiki irqiy qirghinchiliqi xelq'araliq qiziq témilardin boluwatqanda amérikaning ittipaqdashliri gherb dunyasining musteqil tekshürüsh guruppilirigha Uyghur diyarida cheklimisiz we shertsz tekshürüsh hoquqi bérilishni yene bir qétim qattiq tekitlidi.

"Blombérg xewerliri" torining 31-maydiki xewiride éytilishiche, amérika bilen yéqin ittipaqdashliq munasiwitide boluwatqan awstraliye we yéngi zélandiye hökümetliri Uyghurlar duch kéliwatqan nöwettiki siyasiy basturushning heqiqiy ehwalini xitay axbaratliridin emes, belki neq meydan tekshürüshi arqiliq igileshni telep qilishqa bashlighan. Bolupmu awstraliye bash ministiri skot morrison we yéngi zélandiyening bash ministiri jéysinda ardérn düshenbe küni birleshme bayanat élan qilip: "Xitay hökümiti hazir kishilik hoquq mesililiri boyiche éghir endishilerge seweb boluwatqan shinjang rayonigha birleshken döletler teshkilati (b d t) we bashqa guruppilarning tosqunsiz we shertsiz kirishige ruxset qilishi lazim" dep körsetti.

Xewerde éytilishiche, ularning bu telipi xitay hökümitining yéqinqi mezgillerde köp tekrarlan'ghan "Biz chet'el axbarat wasitilirining we tekshürgüchilirining shinjanggha bérip tekshürüp körüshini qizghin qarshi alimiz" dégen bayanatigha qarita éytilghaniken. Bolupmu xitay hökümiti gherb axbarat wasitilirining "Milyonche Uyghur yighiwélish lagérlirigha qamalghan" dégen mezmundiki xewerlirini inkar qilishqa bashlighandin buyan bu bayanatni köp qétim tekitligen iken. Emma herqétim chet'el tekshürüsh ömeklirining bu heqtiki telipini tapshuruwalghanda buninggha bir qatar shertlerni qoyup, özliri békitip bergen jaylarni tekshürüshi lazimliqini bildürüp kelgen. Bu ehwal bolsa izchil türlük gumanlargha seweb bolup kelgenidi. "Kishilik hoquqni közitish teshkilati" 2021-yili 19-aprélda élan qilghan Uyghurlar heqqidiki mexsus doklattimu bu mesile alahide tilgha élinip "Xitay hökümitining chet'el tekshürüsh ömeklirige her xil tosqunluqlarni peyda qilishi bu tosqunlarning arqisigha némilerning yoshurun'ghanliqi heqqidiki türlük so'allargha seweb bolmaqta" dep körsitilgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet