B d t xewpsizlik kéngishide amérika we gérmaniye xitayni Uyghurlar mesiliside qattiq eyiblidi

Muxbirimiz eziz
2019-07-03
Élxet
Pikir
Share
Print

2-Iyul küni birleshket döletler teshkilati (b d t) ning bash shtabida ötküzülgen xewpsizlik kéngishining yighinida amérika we gérmaniye wekilliri xitay hökümitining milyonlighan Uyghurni lagérgha qamishi hemde ularni eng eqelliy heqlerdinmu mehrum qaldurushini qattiq eyiblidi.

Roytérs agéntliqining 2-iyul künidiki yighin'gha qatnashqan bir qisim chet'el déplomatlirining bayanliridin neqil keltürishiche, shu qétimliq yépiq yighinigha b d t xewpsizlik kéngishige eza 15 döletning wekili qatnashqan iken. Yighinda amérika qoshma shtatlirining b d t da da'imiy turushluq muweqqet bash elchisi jonasan ko'én xitay hökümitini "Uyghurlargha zulum qilish we xorlash qilmishliri sadir qiliwatisiler," dep qattiq ibariler bilen eyibligen.

Melum bolushiche, xitay hökümitining b d t da da'imiy turushluq bash elchisi ma jawshü öktemlik bilen jawab qayturup "Amérika we gérmaniyening b d t xewpsizlik kéngishining yighinida bashqa döletlerning ichki ishlirigha munasiwetlik mesililerni tekitlesh heqqi yoq," dep turuwalghan.

Amérika tashqi ishlar ministirliqi bu weqe heqqide roytérs agéntliqining so'allirigha jawab bérip "Amérika hökümiti xitayning Uyghurlargha qarshi bu xildiki zulum herikitidin shundaqla chet'ellerdiki Uyghurlarni xitaygha qaytishqa mejburlash qilmishidin bekmu endishe qiliwatidu. Shunga biz bu mesilini xewpsizlik kéngishide otturigha qoyduq," dégen.

Ötken ayda amérika, en'gliye we bashqa gherb döletliri b d t térrorluqqa qarshi turush ishxanisining mudiri wiladimir woronkowning atalmish "Terbiyelesh merkezliri" ni ziyaret qilishigha qarshi turghan idi. Ular bu ziyaretning xitay hökümiti qiliwatqan ishlarni "Yolluq" dep tetür xulase chiqirishidin endishe qilghan idi. Amérika tashqi ishlar ministirliqining mu'awin ministiri jon sulliwan bu seper bashlanmay turupla b d t bash katipi antonyo guttéris bilen sözliship "Xitay hökümiti izchil Uyghurlargha yürgüzüwatqan zulum siyasitini qanunluq bolghan térrorluqqa qarshi heriket dep teswirlep kelmekte," dep körsetken idi.

Toluq bet