«Иқтисадшунас» гезити: «хитай һөкүмити уйғурларни қандақ езиватиду?»

Мухбиримиз сада
2019-07-10
Елхәт
Пикир
Share
Принт

Йеқинда әнглийәдә чиқидиған «иқтисадшунас» гезити уйғур дияридики назарәт қаттиқ системиси вә хитай һөкүмитиниң уйғурларға қаратқан еғир бастурушлири тәпсилий тонуштурулған бир видийолуқ хәвәр тарқатқан.

Мәзкур гезитниң 9-июлдики саниға бесилған бу видийолуқ хәвәрдә райондики уйғурларниң хитай һөкүмити тәрипидин системилиқ һалда тутқун қилиниватқанлиқи, һөкүмәтниң дунядики әң тәрәққий қилған вә көләмләшкән назарәт системиси арқилиқ районни бир чоң «сақчи дөлити» гә айландурғанлиқи, тутқун қилинмиған уйғурларниңму мушундақ юқири бесим астида һаят кәчүридиғанлиқи баян қилинған.

Мәзкур видийолуқ хәвәрдә көрситилишичә, америкадики уйғур адвокат нурий түркәл әпәндиму юқириқи нуқта һәққидә сөз қилип: «сиз ойлап беқиң, әгәр һөкүмәт сизниң ян телефониңизға сизни назарәт қилидиған юмтални қачилашқа мәҗбурлиса, улар сизниң биологийәлик учурлириңизни зорму-зор еливалса қандақ һессиятта болисиз?» дегән.

Хәвәрдә йәнә уйғурларниң нормал диний паалийәтлири, һәтта исламий исимларни қоллинишниңму һөкүмәт даирилири тәрипидин чәкләнгәнлики нуқтилиқ тилға елинған.

Бу һәқтә сөз қилған «иқтисадшунас» гезитиниң хәлқаралиқ мухбири җон паркер хитай һөкүмитиниң ислам динини «вақти өткән дин» дәп қарап, униңға болған зиянкәшликлирини изчил давам қиливатқанлиқини тилға алған.

Нөвәттә, ғәрб дөләтлиридики һәрқайси ахбарат васитилириниң уйғурларниң нөвәттики әһвалиға болған диққәт-етибари күнсайин ешип бармақта.

Пикирләр (0)
Share
Толуқ бәт