Uyghur mesilisi suzan rays bilen xitayning pakistandiki mu'awin bash elchisi otturisida toqunush peyda qildi

Muxbirimiz erkin
2019-07-15
Élxet
Pikir
Share
Print

Uyghur mesilisi amérikining sabiq dölet xewpsizlik meslihetchisi suzan rayis bilen xitayning pakistanda turushluq mu'awin bash elchisi jaw lijyen otturisida keskin söz urushini keltürüp chiqarghan.

Söz urushigha b d t kishilik hoquq kéngishide turushluq 22 döletning bash elchilirining yéqinda yazghan Uyghurlar heqqidiki birleshme mektubi we ja lijyenning twittirda uninggha yazghan inkas seweb bolghan. "Jenubiy xitay seher pochtisi" gézitining 15‏-iyul xewer qilishiche, suzan rayis jaw lijyenning yazghan inkasini "Rezil irqchiliq" dep tenqidligen.

Ötken hepte en'gliye, yaponiye, gérmaniye qatarliq gherbtiki 22 döletning b d t kishilik hoquq kéngishidiki bash elchiliri b d t kishilik hoquq aliy komissari mishél bashiléytqa birleshme mektup yézip, xitayning lagérlarni taqishini, Uyghurlarni keng kölemlik tutqun qilishqa xatime bérishini, b d t ning Uyghur rayonida tekshürüsh élip bérishigha yol qoyushini telep qilghan. Bu mektup xelq'ara taratqularda qattiq ghulghula qozghighan. Arqidinla shimaliy koréye, se'udi erebistan, pakistan, süriye, rusiye qatarliq 37 istibdat dölet xitayning Uyghur rayonidiki siyasitini qollaydighanliqini élan qilghanidi.

"Jenubiy xitay seher pochtisi" gézitining xewiride qeyt qilinishiche, jaw lijyen twittirgha yollighan 37 döletning mektupini "Amérika we gherbning kachitigha bir shapilaq salghanliqi" dep teripligen. U inkasida "Washin'gtonda aqlar héchqachan uning gherbiy jenubidiki rayonlargha ötmeydighanliqi, chünki, bu rayonlarda qarilar we latinlarning yashaydighanliqi, washin'gtonda qarilar kelse aqlar kétidighanliqi, qara tenlikler a'ililer köchüp kirgen rayonlarda öy bahasi chüshüp kétidighanliqi" ni ilgiri sürgen. Suzan rayis yekshenbe küni jaw lijyenning bu sözini qattiq tenqidlep: "Sen bir rezil irqchi. Shundaqla chöchüterlik derijide qalaq biri. Normal ehwalda bolghan bolsa, sen qarshi élinmaydighan adem, dep élan qilin'ghan bolatting" dégen. Suzan rayis yene xitayning washin'gtonda turushluq bash elchisi suy tyenkeyge chaqiriq qilip, jaw lijyenning chaqirtilip kétishi kéreklikini bildürgen.

Suzan rayis bilen jaw lijyen otturisidiki söz urushi xitay hökümiti 2 milyondek Uyghur we bashqa xelqlerni yighiwélish lagérlirigha qamap, Uyghurlar omumyüzlük teqib astigha élin'ghan, ochuq ashkara irqiy kemsitishke uchrawatqan mezgilde partlap, közetküchilerning diqqitini qozghidi.

Toluq bet