Mahatirning Uyghurlar heqqidiki so'allargha bergen éhtiyatchan jawabi tenqidke uchridi

Muxbirimiz irade
2019-08-01
Share

Malaysiya bash ministiri mahatir mohemmedning Uyghurlar heqqidiki so'allargha jawab bergende nahayiti éhtiyatchanliq bilen gep qilishi diqqet qozghidi.

U, charshenbe küni "TRT WORLD" muxbirlirining ziyaritini qobul qilghanda, muxbirlar uningdin néme üchün musulman döletlerning xitayning Uyghur élidiki siyasetlirige waqtida inkas qayturmaywatqanliqini we néme üchün malaysiyaning 22 dölet teripidin qol qoyulghan imzaliq xette orun almighanliqini sorighan.

Mahatir muhemmed buninggha "Biz qilalaydighan ishimizni qilimiz. Qarap turup, tuxumni tashqa uridighan ishni qilmaymiz" dep jawab bergen.

U yene özining xitay hökümitini tenqidleshtin awwal yenimu köp uchurgha éhtiyaji barliqini, küchlük döletler bilen mu'amile qilghanda ehwalgha qarap turup ish körüsh kéreklikini bildürgen. U "Biz xitay hökümiti eyibleshke uchrawatqan mesililerning bezilirini éniqlap chiqishimiz kérek. Elwette, ular ret qilidu. Menche, bu mesilide bizning ziddiyetlishish emes, belki kéngishishimiz we u yerde emeliyette yüz bériwatqanlarni otturigha chiqirishimiz kérek. Biz xitayni tenqidlisek bolidu, emma tenqidlesh bilen ish tang atmaydu," dégendek sözlerni qilghan.

Mahatir muhemmedning yuqiriqi jawabi kishilik hoquq organlirining tenqidige uchridi. Kishilik hoquqni közitish teshkilati asiya ishliri bölümining mu'awin bashliqi fil robértson bu heqte toxtilip "Mahatir muhemmedke oxshash merdaniliqi bilen tonulghan kishilerningmu xitaygha kelgende tilini chaynap qélishi xitay hökümitining tenqidiy awazlarni öchürüsh üchün qandaq heriketlerni qiliwatqanliqini éniq ipadilep turmaqta" dégen. U yene dunya islam hemkarliq teshkilati qatarliq organlarningmu xitayning Uyghur musulmanlirigha qiliwatqan zulumini tenqidlimeywatqanliqi, malaysiyaning herikitiningmu xuddi yuqiriqi bu organ'gha oxshaydighanliqini ipade qilghan.

Malaysiyadiki "Musulman guruppilar birliki" ning bashliqi aminuddin yehya bolsa mahatir muhemmedning sözini tenqidlep "Xitay hökümitining Uyghur musulmanlirigha qiliwatqan zulumini ispatlaydighan nurghun menbeler bar. Bu dégen bir siyasiy mesile emes. Malaysiya hökümiti musulmanlargha qiliniwatqan bundaq mu'amilige bolghan naraziliqini xitaygha ochuq ipade qilishi kérek" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet