Уйғурлар мәсилиси барғансери зор хәлқара қоллашқа игә болмақта

Мухбиримиз әзиз
2020-08-04
Елхәт
Пикир
Share
Принт

Милйонлиған уйғурниң лагерларға қамилип ғайәт зор роһий вә җисманий қийнақларға дуч келиватқанлиқи пүтүн дуняға мәлум болғандин кейин бу мәсилигә болған тәнқид барғансери кәң районларға йейилишқа башлиди. 3-Авғуст күни кубалиқлар вә кәшмир мусулманлириниң уйғурларни қоллаш һәрикити бу нуқтини техиму очуқ көрсәтти.

«Күндилик ислаһатчи» гезитиниң 3-авғусттики хәвиригә қариғанда американиң филорида штатидики «куба қаршилиқ көрситиш тәшкилати» уйғурлар дияридики мәҗбурий әмгәккә четишлиқ әһваллардин хәвәрдар болғандин кейин «уйғурларниң мәҗбурий әмгикигә хатимә бериш иттипақи» ға қошулушни қарар қилған. Бу иттипақ 130 дин артуқ тәшкилатниң баш қошуши билән вуҗудқа кәлгән болуп, йеқинқи мәзгилләрдин буян изчил хәлқарадики чоң ширкәтләрни уйғурлар дияри билән бағлинишлиқ болған мәҗбурий әмгәк һәққидә агаһландуруп кәлмәктикән.

«Куба қаршилиқ көрситиш тәшкилати» ниң баш катипи орландо өзлириниң немә үчүн бу иттипаққа қошулуш қарариға кәлгәнлики һәққидә боронат ахбарат вастилириға сөз қилғанда бу нуқтини алаһидә тәкитлигән һәмдә «коммунистик һакимийәтләрниң қуллар әмгикини екисплаттатсийә вастисиға айландурувелиши дәл биз кубалиқлар көп қетимлап баштин кәчүргән қисмәтләрниң бири» дегән.

Хәвәрдә ейтилишичә, хитай компартийәси «бир бәлвағ бир йол қурулуши» ни башлиғандин буян өзлириниң узун йиллиқ «қәдинас бурадири» болған куба һакимийитини мәзкур қурулушқа елип киргән. Әмма кубаниң «қәдимки йипәк йоли» билән һечқандақ алақиси йоқ икән. Улар буни «хитайниң латин америкасини бойсундуруш урунушиниң дәсләпки қәдәмлири» дәп қаримақтикән.

3-Авғуст күни «иқтисад вақти» гезити кәшмирдики мусулманларниң уйғурлар дуч келиватқан паҗиәләр һәққидики баянатини елан қилған. Униңда ейтилишичә, шу күни сиринагардики кәшмир мусулманлириниң рәһбәрлиридин һашим қурәйиш хитай һөкүмитиниң уйғурлардики диний етиқадни чәкләш тәдбирлирини қаттиқ әйиблигән һәмдә хитай һөкүмитиниң шәрқий ладах районидики паалийәтлирини «кеңәймичилик урунушиниң ипадиси» дәп көрсәткән. У бу һәқтә сөз қилип «мушундақ бир һакимийәтниң һиндистанға кеңәймичилик қилишини қоллаватқан кишиләрниң әқли-һуши һәққидә мәрсийә йезиш лазим. Чүнки улар һиндистанниң дүшмини» дегән.

Пикирләр (0)
Share
Толуқ бәт