Америка сиясәт саһәсидики муһим әрбаблар уйғур мәсилисидә муназирә қилишмақта

Мухбиримиз ирадә
2019-10-10
Елхәт
Пикир
Share
Принт

Америка ақ сарайниң иқтисад мәслиһәтчиси петир наварро 9-өктәбир күни америка «фокс» телевизийәсиниң программисиға қатнишип, америка-хитай сода келишими һәққидә сөз қилғанда уйғур елидә йүргүзүлүватқан еғир бастуруш сиясити үстидә тохталди.

У трамп һөкүмити тәрипидин хитайниң 28 муәссәсигә қарита чиқирилған җаза тәдбирлири һәққидә тохталғанда хитай һөкүмитиниң нөвәттә уйғур елидә мушу әсирдики әң еғир кишилик һоқуқи дәпсәндичиликигә сәвәб болуватқанлиқини, нөвәттә у йәрдә 2 милйондин артуқ кишиниң йиғивелиш лагерлириға соланғанлиқи қәйт қилди.

9-Өктәбир күни йәнә американиң сабиқ муавин президенти вә һазирқи демократчилар партийәсиниң президент намзатлиридин бири болған җо байдин бир йиғинда сөзлигән нутқида америка президенти трампни кишилик һоқуқ мәсилисидә хитайға қаттиқ позитсийә билдүрмиди, дәп әйиблигән. «Әркин көрсәткүч» намлиқ гезитниң хәвәр қилишичә, җо байдин шу күнидики сөзидә «хитай һөкүмитиниң уйғур мусулманлириға кишини чөчүтидиған дәриҗидики ғайәт зор кишилик һоқуқ дәпсәндичилики йүргүзүп, уларни қайта тәрбийә лагерлириға солаватқан бир пәйттә вә хоңкоңда намайишчилар зораванлиққа учраватқанда президент трампниң буниңға инкас қайтурмай сүкүттә турувалғанлиқи» ни билдүргән. У сөзидә йәнә «у кишилик һоқуқ һәққидә гәп қилип бақтиму, у хоңкоңлуқлар үчүн вә ‹қайта тәрбийә лагерлири' дики уйғурлар үчүн орнидин туруп бақтиму?» дегән.

Уйғур мәсилиси нөвәттә америка сиясәт саһәсидики юқири дәриҗилик әрбаблар тәрипидин муназирә қилинидиған муһим темиға айланмақта.

Пикирләр (0)
Share
Толуқ бәт