Amérika siyaset sahesidiki muhim erbablar Uyghur mesiliside munazire qilishmaqta

Muxbirimiz irade
2019-10-10
Élxet
Pikir
Share
Print

Amérika aq sarayning iqtisad meslihetchisi pétir nawarro 9-öktebir küni amérika "Foks" téléwiziyesining programmisigha qatniship, amérika-xitay soda kélishimi heqqide söz qilghanda Uyghur élide yürgüzülüwatqan éghir basturush siyasiti üstide toxtaldi.

U tramp hökümiti teripidin xitayning 28 mu'essesige qarita chiqirilghan jaza tedbirliri heqqide toxtalghanda xitay hökümitining nöwette Uyghur élide mushu esirdiki eng éghir kishilik hoquqi depsendichilikige seweb boluwatqanliqini, nöwette u yerde 2 milyondin artuq kishining yighiwélish lagérlirigha solan'ghanliqi qeyt qildi.

9-Öktebir küni yene amérikaning sabiq mu'awin prézidénti we hazirqi démokratchilar partiyesining prézidént namzatliridin biri bolghan jo baydin bir yighinda sözligen nutqida amérika prézidénti trampni kishilik hoquq mesiliside xitaygha qattiq pozitsiye bildürmidi, dep eyibligen. "Erkin körsetküch" namliq gézitning xewer qilishiche, jo baydin shu künidiki sözide "Xitay hökümitining Uyghur musulmanlirigha kishini chöchütidighan derijidiki ghayet zor kishilik hoquq depsendichiliki yürgüzüp, ularni qayta terbiye lagérlirigha solawatqan bir peytte we xongkongda namayishchilar zorawanliqqa uchrawatqanda prézidént trampning buninggha inkas qayturmay sükütte turuwalghanliqi" ni bildürgen. U sözide yene "U kishilik hoquq heqqide gep qilip baqtimu, u xongkongluqlar üchün we 'qayta terbiye lagérliri' diki Uyghurlar üchün ornidin turup baqtimu?" dégen.

Uyghur mesilisi nöwette amérika siyaset sahesidiki yuqiri derijilik erbablar teripidin munazire qilinidighan muhim témigha aylanmaqta.

Toluq bet