Bosniye bilen ottura asiya döletlirining Uyghurlar mesilisige tutqan pozitsiyesi diqqet qozghimaqta

5-Noyabir küni “Asiya xewerliri” torida élan qilin'ghan bir maqalide, dunya Uyghur qurultiyi (d u q) ning mu'awin re'isi zumret'ay erkin bilen bolghan söhbetning mezmuni bérilgen. Uningda nuqtiliq qilip d u q ning 8-nöwetlik wekiller qurultiyining némishqa bosniye paytexti sarayéwoda ötküzülgenliki, gherb döletliri Uyghur élidiki yighiwélish lagérliri hem buninggha munasiwetlik kishilik hoquq jinayetlirige köngül bölüwatqanda, ottura asiyadiki qoshna döletlerning buninggha némishqa süküt qilghanliqi tehlil qilin'ghan.

Zumret'ay erkin muxbirgha bergen jawabida, bosniye paytexti sarayéwoning irqiy qirghinchiliqqa shahit bolghan bir jay ikenliki, mushundaq jayda yashighan kishiler we siyasetchilerningla Uyghurlarning béshigha kelgen zulum we ziyankeshlikni chüshinidighanliqini éytqan. Bosniye musulmanlar köp sanliq bir dölet bolup, Uyghurlar bilen dindashliqi sewebidin küchlük hésdashliq we hemkarliq tuyghusigha ige iken.

Halbuki, ottura asiyadiki döletler Uyghurlar bilen millet, din, medeniyet jehette ortaq alahidilikke ige bolushigha qarimay Uyghurlar duch kelgen irqiy qirghinchiliqqa köz yumup, xitay bilen hemkarlashqan, xitay hökümitining “Uyghurlarning turmushi tereqqiy qilip ketti” dégen teshwiqatlirigha ishinip, “Xitayning qolida güllinish” yolini tallighan. Zumret ay erkin bularning tamamen xitayning aldamchiliq taktikiliri ikenlikini, yene bir jehettin qazaqistan, qirghizistan, tajikistan hökümetliri xitaydin kélidighan ghayet zor mebleghge tayinip qalghachqa, Uyghurlar mesilisini tamamen “Untup” xitay terepke ötüp ketkenlikini bildürgen.