Әмгәк партийәси уйғурлар мәсилисигә игә чиқидиғанлиқини билдүрди

Мухбиримиз әзиз
2019-12-03
Елхәт
Пикир
Share
Принт

Йеқинда ашкариланған уйғурларни бастурушқа мунасивәтлик бир қисим мәхпий һөҗҗәтләр хитай һөкүмитиниң «кәспий тәрбийәләш мәктипи» намида қандақ қәбиһликләрни қиливатқанлиқини дуняға ашкарилиди. Буниң билән дуняниң һәрқайси җайлирида уйғурлар мәсилисигә көңүл бөлүш чуқанлири йеңиваштин оттуриға чиқишқа башлиди. Әнглийәдики әмгәк партийәси йеқинда өзлириниң хитай билән болған кәлгүси сөһбәтлиридә уйғурларниң зулумға учраш мәсилисини җиддий сүрүштә қилидиғанлиқини билдүрди.

Әнглийәдики әң чоң сиясий хәвәрләр агентлиқиниң бири болған «сол путчилап алға» торида елан қилинған флора холмес имзасидики мақалида ейтилишичә, консерватиплар партийәси йетәкчиликидики британийә һөкүмити уйғурлар еғир бастурушқа учраватқан әһвалда изчил хитай билән болған сода вә башқа иқтисадий паалийәтләрни давам әттүргән. Шуниңдәк бу хил кишилик һоқуқ дәпсәндичиликини хитай һөкүмитиниң йүзигә салмиған.

Мақалида ейтилишичә, әмгәк партийәсиниң рәһбири һәмдә нөвәттики сайламға қатнишиватқан намзатларниң бири болған җеремий корбин уйғурлар мәсилиси һәққидә хитайға қаттиқрақ йосунда сөз қилиш керәкликини билдүргән. Шуниңдәк сода мунасивитиниң қиммәт қариши вә мәнпәәтләр мунасивитини астин-үстүн қиливетишиға йол қоймаслиқни тәкитлигән.

Аптор ахирида «бирләшмә падишаһлиқ кишилик һоқуқ вә етиқад һәқлирини қоғдашни мәркизий орунға қойғанда ялғуз уйғурлар үчүнла әмәс, зулумға учриған барлиқ хәлқләр үчүнму көкрәк керип оттуриға чиққан болиду» дәп язиду.

Пикирләр (0)
Share
Толуқ бәт