Emgek partiyesi Uyghurlar mesilisige ige chiqidighanliqini bildürdi

Muxbirimiz eziz
2019-12-03
Élxet
Pikir
Share
Print

Yéqinda ashkarilan'ghan Uyghurlarni basturushqa munasiwetlik bir qisim mexpiy höjjetler xitay hökümitining "Kespiy terbiyelesh mektipi" namida qandaq qebihliklerni qiliwatqanliqini dunyagha ashkarilidi. Buning bilen dunyaning herqaysi jaylirida Uyghurlar mesilisige köngül bölüsh chuqanliri yéngiwashtin otturigha chiqishqa bashlidi. En'gliyediki emgek partiyesi yéqinda özlirining xitay bilen bolghan kelgüsi söhbetliride Uyghurlarning zulumgha uchrash mesilisini jiddiy sürüshte qilidighanliqini bildürdi.

En'gliyediki eng chong siyasiy xewerler agéntliqining biri bolghan "Sol putchilap algha" torida élan qilin'ghan flora xolmés imzasidiki maqalida éytilishiche, konsérwatiplar partiyesi yétekchilikidiki britaniye hökümiti Uyghurlar éghir basturushqa uchrawatqan ehwalda izchil xitay bilen bolghan soda we bashqa iqtisadiy pa'aliyetlerni dawam ettürgen. Shuningdek bu xil kishilik hoquq depsendichilikini xitay hökümitining yüzige salmighan.

Maqalida éytilishiche, emgek partiyesining rehbiri hemde nöwettiki saylamgha qatnishiwatqan namzatlarning biri bolghan jérémiy korbin Uyghurlar mesilisi heqqide xitaygha qattiqraq yosunda söz qilish kéreklikini bildürgen. Shuningdek soda munasiwitining qimmet qarishi we menpe'etler munasiwitini astin-üstün qiliwétishigha yol qoymasliqni tekitligen.

Aptor axirida "Birleshme padishahliq kishilik hoquq we étiqad heqlirini qoghdashni merkiziy orun'gha qoyghanda yalghuz Uyghurlar üchünla emes, zulumgha uchrighan barliq xelqler üchünmu kökrek kérip otturigha chiqqan bolidu" dep yazidu.

Toluq bet