Америка ташқи ишлар министирлиқи: «бейҗиңниң уйғурларға қиливатқан һуҗуми террорлуққа қарши туруш билән алақисиз»

Мухбиримиз ирадә
2019-12-05
Елхәт
Пикир
Share
Принт

Америка ташқи ишлар министирлиқи «бейҗиңниң уйғурларға қиливатқан һуҗуми террорлуққа қарши туруш билән алақисиз», деди.

Америка ташқи ишлар министирлиқи 4-декабир күни өзиниң тивиттир вә фейисбук қатарлиқ иҗтимаий таратқулардики рәсмий сәһиписидә қисқа баянат елан қилип хитай һөкүмитиниң уйғур елидики сиясәтлирини «террорлуққа қарши туруш һәрикитиниң бир парчиси» дәп ақлашта чиң туруватқанлиқини тәнқид қилди.

Улар баянатида мундақ дегән: «хитай һөкүмити һелиһәм уйғурлар вә башқа мусулман милләтләргә қаратқан тутқун һәрикитиниң қанунлуқ икәнлики вә буниң террорлуққа қарши туруш һәрикитиниң бир қисми икәнликидә чиң туруватиду. Әмма пакитлар болса буниң әксичә. Тутқунлар у йәрдә қейин-қистаққа елиниватиду. Улар дини вә миллий кимликидин тенишқа мәҗбурлиниватиду».

Америка ташқи ишлар министирлиқи йәнә өзиниң хәвәр тор бети болған «Share America» намлиқ тор бетидиму «бейҗиңниң уйғурларға қиливатқан һуҗуми террорлуққа қарши туруш билән алақисиз» мавзулуқ мақалә елан қилди. Мақалидә, хитай һөкүмитиниң райондики бир милйондин ошуқ уйғур вә башқа мусулман милләтләрни қайта тәрбийә лагерлириға қамаш арқилиқ, әмәлийәттә уларниң миллий вә дини кимликини йоқитишқа һәрикәт қиливатқанлиқини баян қилған вә пакит сүпитидә хитай даирилиниң нөвәттә райондики уйғурларниң зиялийлириға қаттиқ зәрбә бәргәнликини, тарихий мәсчит-мәқбәрилирини вәйран қилғанлиқи, ата-аниларниң өз пәрзәнтлирини миллий вә дини әнәнилири бойичә тәрбийәләштин чәкләватқанлиқидәк пакитларни көрсәткән вә «буларниң һечқайсисиниң террорлуқ билән алақиси йоқ» дәп әскәрткән.

Америка ташқи ишлар министирлиқи арқидин йәнә, иҗтимаий таратқуларда түрмидики уйғур зиялийси илһам тохтиниң қизи җәвһәр илһамниңму лагерлар мәсилиси һәққидә сөзлигән қисқа нутқини тарқитип, америка вә дуня җамаитиниң райондики йүз бериватқанлар һәққидики еңини ашурди.

Пикирләр (0)
Share
Толуқ бәт