Amérika tashqi ishlar ministirliqi: "Béyjingning Uyghurlargha qiliwatqan hujumi térrorluqqa qarshi turush bilen alaqisiz"

Muxbirimiz irade
2019-12-05
Élxet
Pikir
Share
Print

Amérika tashqi ishlar ministirliqi "Béyjingning Uyghurlargha qiliwatqan hujumi térrorluqqa qarshi turush bilen alaqisiz", dédi.

Amérika tashqi ishlar ministirliqi 4-dékabir küni özining tiwittir we féyisbuk qatarliq ijtima'iy taratqulardiki resmiy sehipiside qisqa bayanat élan qilip xitay hökümitining Uyghur élidiki siyasetlirini "Térrorluqqa qarshi turush herikitining bir parchisi" dep aqlashta ching turuwatqanliqini tenqid qildi.

Ular bayanatida mundaq dégen: "Xitay hökümiti hélihem Uyghurlar we bashqa musulman milletlerge qaratqan tutqun herikitining qanunluq ikenliki we buning térrorluqqa qarshi turush herikitining bir qismi ikenlikide ching turuwatidu. Emma pakitlar bolsa buning eksiche. Tutqunlar u yerde qéyin-qistaqqa éliniwatidu. Ular dini we milliy kimlikidin ténishqa mejburliniwatidu".

Amérika tashqi ishlar ministirliqi yene özining xewer tor béti bolghan "Share America" namliq tor bétidimu "Béyjingning Uyghurlargha qiliwatqan hujumi térrorluqqa qarshi turush bilen alaqisiz" mawzuluq maqale élan qildi. Maqalide, xitay hökümitining rayondiki bir milyondin oshuq Uyghur we bashqa musulman milletlerni qayta terbiye lagérlirigha qamash arqiliq, emeliyette ularning milliy we dini kimlikini yoqitishqa heriket qiliwatqanliqini bayan qilghan we pakit süpitide xitay da'irilining nöwette rayondiki Uyghurlarning ziyaliylirigha qattiq zerbe bergenlikini, tarixiy meschit-meqberilirini weyran qilghanliqi, ata-anilarning öz perzentlirini milliy we dini en'eniliri boyiche terbiyeleshtin cheklewatqanliqidek pakitlarni körsetken we "Bularning héchqaysisining térrorluq bilen alaqisi yoq" dep eskertken.

Amérika tashqi ishlar ministirliqi arqidin yene, ijtima'iy taratqularda türmidiki Uyghur ziyaliysi ilham toxtining qizi jewher ilhamningmu lagérlar mesilisi heqqide sözligen qisqa nutqini tarqitip, amérika we dunya jama'itining rayondiki yüz bériwatqanlar heqqidiki éngini ashurdi.

Toluq bet