Америка, әнглийәдики уйғур вә йәһудилар ханукаһ күни лагердики уйғурларни хатирилиди

Мухбиримиз әркин
2020-12-11
Share

Америка, әнглийәдики уйғур вә йәһудий тәшкилатлири 10-декабир йәһудиларниң ханукаһ байрими күни бирләшмә паалийәт өткүзүп, лагердики уйғур тутқунлирини хатирилигән. Бу уйғурларниң 1-қетим йәһудилар билән бирлишип ханукаһ кечисидә бундақ паалийәт өткүзүшидур. Америкадики хатириләш паалийити 10-декабир кечиси вашингтондики линколн хатирә сарийиниң алдида өткүзүлгән. Паалийәттә америка уйғур бирләшмисиниң программа директори макс гелбер сөз қилип, уйғурларниң 70 йилдин кейин йәһудилар билән охшаш мәсилигә дуч кәлгәнликини билдүргән.

Униң тәкитлишичә, уйғур мәсилиси "уйғурларниң етиқади үчүн қилинидиған күрәш болуштин һалқип чиқип, инсанийәтниң ортақ мәсилисигә айланған." вашингтондики паалийәтни америка уйғур бирләшмиси, уйғур кишилик һоқуқ қурулуши вә йәһудий тәшкилатлири орунлаштурған. Шу күни йәнә дуня уйғур қурултийи әнглийәдики 8 йәһудий яшлар тәшкилати билән торда хатириләш паалийити өткүзгән. "йәһудий кроникал" гезитиниң билдүрүшичә, әнглийәдики паалийәт ханукаһ байриминиң 3-күниму йәнә өткүзүлидикән.

Хәвәрдә америкадики йәһудий һәрикити тәшкилати, явропа йәһудий оқуғучилири тәшкилатиниңму уйғурларниң әркинлики үчүн бундақ паалийәт уюштурғанлиқини билдүргән. "йәһудий кроникал" гезитиниң тәкитлишичә, бу паалийәтниң ханукаһ күни өткүзүлүшидики сәвәб бу байрамниң "йәһудиларниң бир империйә зулумини мәғлуп қилғанлиқиға вәкиллик қилиши билән мунасивәтлик" икән.

Хәвәрдә грек импирийәси йәһудиларниң мәдәнийити вә динини йоқитишқа урунғандәк хитайниңму уйғурларни йоқитишқа урунуватқанлиқи, һәр икки залимниң қилмиши охшап кетидиғанлиқи тәкитләнгән. Ханукаһ йәһудиларниң қәдимки грек импирийәсигә қарши қозғилаң көтүрүп, 2-ибадәтханисиниң қайта тиклинишини хатириләш байрими болуп, "йоруқлуқ байрими" дәп атилидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт