Xitay taratquliri nenchangda “Milletler ittipaqliqi oqush mukapati” tesis qilghan bir Uyghur yashni teshwiq qilishqa bashlighan

“Xitay xewerliri” torining 11-yanwar küni tarqatqan xewiride, jyangshining nenchang shehiride tijaret qiliwatqan miradil isimlik bireylenning özi oqughan mektipi— jyangshi pen-téxnika institutigha bir milyon yüen i'ane qilip, “Anarning danisidek zich uyushqan milletler ittipaqliqi oqush mukapati” tesis qilghanliqi teshwiq qilin'ghan.

Xewerde éytilishiche, miradil xotenning chira nahiyesidin bolup, 2013-yil 9-ayda jyangshining nenchang shehiride aliy mektep hayatini bashlighan, oquwatqan mezgilidila Uyghur rayonining mehsulatlirini torda sétish bilen pul tépip, kéyin ashxana échip milyonér bolghan. U nenchangdiki mektipige pul i'ane qilip oqush mukapati tesis qilmaqchi bolghan bolsimu, mektep köp qétim uni ret qilghan. Kéyin bu mukapatning “Milletler ittipaqliqini ilgiri sürüsh” ke paydiliq ikenlikini közde tutup, mukapat tesis qilishqa qoshulghan.

Öz yurtidiki namratlargha emes, “Ana mektipim” dep atighan nenchang shehiridiki aliy mektepke pul i'ane qilghan miradil, xitay taratqulirida “Karxanichi, yétekchi, saxawetchi” dep teriplen'gen bolup, “Shinjang hékayiliri” ni sözleshte az tépilidighan ülge qilip körsitilgen. Ötken yil 8-ayda, xitay kompartiye sékrétari shi jinping ürümchide yerlik da'irilerge yolyoruq bergende “Shinjangdiki ammini ichkiri xitayda ishqa orunlashturushqa yéteklesh, ichkiri xitaydikilerning shinjanggha kélip igilik tiklishige yardem bérish” dégenni tekitligen bolup, buninggha bina'en xitay teshwiqatliridimu “Milletlerning qoshulushini ilgiri” sürüshke paydiliq yuqiriqidek misallarning otturigha chiqiwatqanliqi körülmekte.