Xitay irqiy qirghinchiliqni inkar qilish teshwiqatida “Shinjang néni”ni qollinishqa bashlighan

Muxbirimiz erkin
2022.11.08
Share on WhatsApp
Share on WhatsApp

2017-Yili bashlan'ghan chong tutqunda nawaylirini lagérlargha qamap, Uyghurlarning nechche ming yilliq musteqil yekke igiliki bolghan Uyghur nawaychiliqini weyran qilghan xitay hökümiti, Uyghur irqiy qirghinchliqini inkar qilishta Uyghur nanlirini qollinishqa bashlighan. Xitay taratqulirining ashkarlishiche, da'iriler 5-noyabir bashlan'ghan shangxey xelq'ara yermenkiside “Shinjang uni”da yasalghan Uyghur nanlirining üstige pishlaq, gösh, zire qatarliq terkiblerni qoyup pishurulghan pishlaq nanni, fransiye téxnikisi bilen “Shinjang yémiki” birleshken “Nan pitsa” dégen namda bazargha salghan.

Xitayning hökümet taratquliridin “Yer shari waqti géziti”ning xewiride, “Xitay bilen gherbning birikimisi” bolghan “Nan pitsa”ning shangxey yermenkisining yémeklik we yéza-igilik mehsulatliri körgezme rayonidiki tamaq cholpanigha aylan'ghanliqini bildürgen. Xewerde éytilishiche, bu xil “Nan pitsa” fransiyening dunyadiki üng chong ximirturuch ishlepchiqish shirkiti bolghan lésafré (Lesaffre) bilen shinjang yer shari zenjirsiman yémeklikler shirkiti birliship bazargha salghan iken.

Bu mehsulat bezi chet el tetqiqat orunlirining doklatlirida, xitayning Uyghurlargha qaritilghan irqiy qirghinchiliq we mejburiy emgekni inkar qilishta Uyghurlardin, shundaqla Uyghurlarning medeniyet-sen'et we dangliq towar markiliridin paydilinip, yuqiri süpetlik teshwiqat widéyosi yaki élan sen'et widéyolirini keng tarqitiwatqanliqi, uning bu arqiliq xelq'arada Uyghurlargha héchqandaq ish bolmighandek tesirat peyda qiliwatqanliqi otturigha qoyulghan bir waqitta, bazargha sélin'ghan.

Xitay hökümiti 2017-yili bashlan'ghan chong tutqunda rayonning herqaysi jayliridiki yekke igilik bilen shughullinidighan Uyghur nawaylirini kolléktip nishan'gha alghan. Tutqunda minglighan nawaylar lagérlargha qamilip, kéyinrek herqaysi jaylarda yéngi qurulghan nan zawutlirida mejburiy nawayliq qilishqa yötkelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.