“Tinch okyan ölchimi” zhurnali teklimakan Uyghur neshriyatini tonushturdi

Amérikadiki nopuzluq zhurnallardin “Tinch okyan ölchimi” namliq zhurnal bu nöwetlik sanida istanbulda mulazimet qiliwatqan teklimakan Uyghur neshriyatini tonushturdi.

Uyghur ana tilini qoghdash témisida yézilghan bu maqalida Uyghurlarning omumi weziyiti, bolupmu nöwettiki lagérlar weziyiti tepsiliy bayan qilin'ghandin kéyin, yéqinqi yillarda Uyghur tili we edebiyatining éghir derijide mewjutluq xewpige duch kelgenliki we mana bu xewpke taqabil turush üchün teklimakan Uyghur neshriyatining 2000-yili qurulghanliqi hem nöwette Uyghur jem'iyiti üchün chong bir boshluqni tolduruwatqanliqi tilgha élin'ghan.

Hazirgha qeder bu neshriyatning 250 che kitab neshr qilghanliqi bayan qilin'ghan bu maqalida, xalide isra'il, chimen'gül awut qatarliq köpligen edib we sha'irlarning ana tilda eser yazghanliqi üchünla tutqunda ikenliki eskertilgen. Maqalida yene mezkur neshriyatning qurghuchisi abdujélil turan ependining shexsiy kechürmishliri we weziyet heqqidiki köz qarashlirighimu orun bérilgen.

Maqalida déyilishiche, abdujélil turan ependi, 20 nechche yildin béri körüshelmigen 3 achisi bilen 2015-yili türkiyede bir körüshüsh pursitige érishken؛ bu méhman qérindashlar ikki ayliq sayahet mudditi toshqandin kéyin abdujélil turanning tosushigha qarimay yurtigha qaytip ketken. Nöwette ularning yighiwélish lagérida ikenlikini hesret bilen bayan qilghan andujélil turan eger weziyetning bu derijide yamanliship kétishini bilgen bolsa, eyni chaghda achilirining qolidiki pasportlirini yirtiwétishi mumkinlikini eskertken.

2008-Yildin buyan neshr qiliniwatqan “Tinch okyan ölchimi” zhurnili ijtima'iy adalet we ékologiye mesililiri heqqidiki yirik tetqiqat maqaliliri we tekshürüsh doklatliri bilen nam qazan'ghan.