“тинч окян өлчими” журнали тәклимакан уйғур нәшриятини тонуштурди

Мухбиримиз шөһрәт һошур
2019.04.10

Америкадики нопузлуқ журналлардин “тинч окян өлчими” намлиқ журнал бу нөвәтлик санида истанбулда мулазимәт қиливатқан тәклимакан уйғур нәшриятини тонуштурди.

Уйғур ана тилини қоғдаш темисида йезилған бу мақалида уйғурларниң омуми вәзийити, болупму нөвәттики лагерлар вәзийити тәпсилий баян қилинғандин кейин, йеқинқи йилларда уйғур тили вә әдәбиятиниң еғир дәриҗидә мәвҗутлуқ хәвпигә дуч кәлгәнлики вә мана бу хәвпкә тақабил туруш үчүн тәклимакан уйғур нәшриятиниң 2000-йили қурулғанлиқи һәм нөвәттә уйғур җәмийити үчүн чоң бир бошлуқни толдуруватқанлиқи тилға елинған.

Һазирға қәдәр бу нәшриятниң 250 чә китаб нәшр қилғанлиқи баян қилинған бу мақалида, халидә исраил, чимәнгүл авут қатарлиқ көплигән әдиб вә шаирларниң ана тилда әсәр язғанлиқи үчүнла тутқунда икәнлики әскәртилгән. Мақалида йәнә мәзкур нәшриятниң қурғучиси абдуҗелил туран әпәндиниң шәхсий кәчүрмишлири вә вәзийәт һәққидики көз қарашлириғиму орун берилгән.

Мақалида дейилишичә, абдуҗелил туран әпәнди, 20 нәччә йилдин бери көрүшәлмигән 3 ачиси билән 2015-йили түркийәдә бир көрүшүш пурситигә еришкән; бу меһман қериндашлар икки айлиқ саяһәт муддити тошқандин кейин абдуҗелил туранниң тосушиға қаримай юртиға қайтип кәткән. Нөвәттә уларниң йиғивелиш лагерида икәнликини һәсрәт билән баян қилған андуҗелил туран әгәр вәзийәтниң бу дәриҗидә яманлишип кетишини билгән болса, әйни чағда ачилириниң қолидики паспортлирини йиртиветиши мумкинликини әскәрткән.

2008-Йилдин буян нәшр қилиниватқан “тинч окян өлчими” журнили иҗтимаий адаләт вә екологийә мәсилилири һәққидики йирик тәтқиқат мақалилири вә тәкшүрүш доклатлири билән нам қазанған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.