Kanadaning toronto shehiridin paytexti ottawagha piyade mangghan Uyghur pa'aliyetchi sepirini ghelibilik axirlashturghan

Kanadada hökümitini Uyghurlarning “Irqiy qirghinchiliqqa” uchrawatqanliqini étirap qilishqa chaqirishni meqset qilip buningdin 2 hepte awwal kanadaning toronto shehiridin piyade yolgha chiqqan Uyghur pa'aliyetchi bilal malik Uyghur, 380 kilométirliq musapini ghelibilik bésip, 19-iyul kanada paytexti ottawagha yétip kelgen. Bilal malik Uyghurning ottawa shehiridiki axirqi menzili kanada bash ministirliq mehkimisining aldi bolup, uni bu orunda toronto, montériyal, kanadaning london qatarliq sheherliridin kelgen Uyghurlar kütüwalghan.

Bilal malik Uyghur “Erkinlik marshi” dep atalghan 15 künlük sepiride yol boyi yerlik siyasetchiler bilen alaqiliship, ularni kanada hökümitige kanada parlaméntining bu yil aprélda maqullighan xitayning Uyghurlargha “Irqiy qirghinchiliq” yürgüzüwatqanliqi heqqidiki qararini ijra qilishqa bésim ishlitishke chaqirghan. U ilgiri radiyomizgha ‍özining bu herikiti arqiliq “Kanadaliqlarning Uyghur mesilisige bolghan diqqitini qozghash” ni, shundaqla bash ministir trudé'oni “Uyghurlarning irqiy qirghinchiliqqa uchrawatqanliqi” ni étirap qilishqa chaqirishni közleydighanliqini bildürgen.

Melum bolushiche, bilal malik Uyghur 19-‍iyul shu yerning waqti etigen sa'et 11:00 lerde bash ministirliq mehkimisi ‍aldigha yétip kélip, bu yerdiki namayishchilargha qoshulghan shundaqla ‍özlirining telipi eks ettürülgen bir mektupni kanada bash ministirliq mehkimisi xadimlirigha tapshurghan. “Kanada sherqiy türkistan jem'iyiti” ning re'isi tuyghun abduweli 19-iyul radiyomizgha marafon yürüshining “Intayin muweppeqiyetlik” bolghanliqi we “Meqsetke yetkenliki” ni bildürdi.