H&M “Shinjang paxtisi” heqqidiki sözi tüpeyli xitaydiki 20 dukinini taqashqa mejbur bolghan

• Muxbirimiz erkin
  2021-04-05

Shiwétsiyening dunyagha dangliq H&M shirkiti Uyghur mejburiy emgek mesilisidiki sözi tüpeyli xitay da'iriliri we xitay taratqulirining hujum nishanigha aylinip, xitaydiki 20 dek dukinini taqashqa mejbur bolghan. “Nyu-york waqti géziti” ning ötken hepte ashkarilishiche, H&M méning xitayda 500 dek dukini bar bolup, ulardin 20 dek dukan taqalghan. Teywen taratqulirining xewerliride, bu dukanlarning bezilirining ijare bergüchi orunning toxtamni buzup, dukanni qayturuwélishi seweblik taqalghanliqi bildürülgen.

Yéqinda H&M, nayki, adidas, yéngi balans, burbériy qatarliq xelq'ara “Süpetlik paxta teshkilati” gha eza bolghan dangliq xelq'ara markilar özlirining “Shinjang paxtisi” gha bolghan endishilirini ipadiligen yaki “Shinjang paxtisi” ni ishletmeydighanliqini bildürüshkenidi. Biraq xitay taratquliri xitay puqralirini bu shirketlerning mehsulatlirini bayqut qilishqa chaqirghan. Buning aldida amérika, kanada, en'gliye we yawropa ittipaqi xitayning Uyghurlargha qaratqan “Irqiy qirghinchiliqi” da jawabkarliqi bar 4 xitay emeldari we bir hökümet apparatini jazalighanidi.

Közetküchilerning qarishiche, xitayning H&M qatarliq shirketlerni bayqut qilishi gherbning xitay emeldarini jazalishigha qarshi xitay hökümiti orunlashturghan pilanliq heriket bolup, bu arqiliq bashqa xelq'ara shirketlerningmu “Shinjang paxtisi” ni ret qilishining aldini élishni meqset qilghaniken. Közetküchiler, nöwette xitay hökümiti 2017-yilining aldida-keynide “Heqsiz” yaki “Erzan emgek küchi” bilen teminleshke wede bérip, Uyghur iligha yötkep kelgen xitay paxta toqumichiliq karxanilirining jiddiy riqabetke duch kelgenlikini bildürmekte.