Gérmaniyelik tetqiqatchilar adidas, puma we hyugo bosning mehsulatliridin “Shinjang paxtisi” ning izini bayqighan

Muxbirimiz erkin
2022.05.06

Gérmaniyelik tetqiqatchilar adidas, puma, hyugo bos qatarliq dunyagha dangliq markilarning mehsulatlirini izotopluq analiz qilish arqiliq, bu mehsulatlarda “Shinjang paxtisi” ning izi barliqini bayqighan. En'gliyediki “Muhapizetchi” gézitining xewer qilishiche, gérmaniyening yawropagha dangliq agro'izoleb tejribexanisi bilen xaksho'él nédérréyn uniwérsitétidiki tetqiqatchilar puma, hyugo bos we adidas qatarliq markilarning maykiliri üstidin izotopluq analiz élip bérip, yuqiriqi netijige érishken.

Xewerde, izotopluq analiz netijisi yuqiriqi gérmaniye shirketlirining teminat zenjirini yötkesh toghrisidiki wedilirige zit bolup chiqqanliqi, hyugo bosning ‍ötken yili 10-ayda mehsulatlirini yershari ölchemlirige mas halgha keltürülgenlikini élan qilghanliqi, pumaning “Shinjang bilen biwasite yaki wasitilik soda alaqimiz yoq” dep jakarlighanliqi tekitlen'gen. “Muhapizetchi “Gézitining éytishiche, agro'izoleb tejribexanisining tetqiqatchisi markus bonér ““Paxta terkibidiki izotop barmaq izi nahayiti éniq bolup, uni bashqa döletlerdin, hetta xitayning bashqa rayonliridin kelgen paxtidin perqlendürgili bolidu” dégen.

Xewerde éytilishiche, “Shinjang paxtisi” ning izliri adidas, puma, hyugo bos qatarliq markiliridin bashqa gérmaniyening dangliq dala kiyim markisi jek wolfsikindinmu bayqalghan. “Muhapizetchi” gézitining ‍éytishiche, ular yuqiriqi shirketler bilen alaqileshken bolup, puma shirkiti “Shinjang paxtisi” ishlitidighanliqini ret qilghan. Adidas shirkiti bolsa bashqa döletlerning paxtisini ishlitiwatqanliqi, paxtini bashqa döletlerdinla menbe qilidighanliqi hemde teminlesh zenjiridiki adil we bixeter xizmet shara'itigha kapaletlik qilish üchün her xil tedbirlerni qollan'ghanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.