Uyghur diyarida “Mol hosulluq paxta” neq meydan yighini échildi

Xitay hökümitining Uyghur diyaridiki mejburiy emgek qilmishi xelq'araning küchlük tenqidige uchrawatqanda Uyghur aptonom rayonluq da'iriler 12-öktebirde “Mol hosulluq paxta” neq meydan yighini chaqirghan hemde aldin tallan'ghan alte neper paxtikarning aghzidin “Kéwezliktiki heqiqet” témisida léksiye orunlashturghan.

Xitay bashqurushidiki “Tengritagh tori” ning 12-öktebirdiki xewiride éytilishiche, lopnur nahiyesining gülbagh yézisidiki kéwezlikte échilghan bu qétimliq ochuq yi'ighinda paxtikar déhqanlar özlirining kéwezliktiki hékayilirini sözligen hemde paxta térishtin qandaq bay bolghanliqini alahide gewdilendürgen. Shuningdek 2018-yilidin ilgiri kéwezlikte adem küchi arqiliq paxta térishning dawam qilghanliqini, hazir pütünley mashina arqiliq paxta yighilidighanliqini tekitligen. Paxtikarlardin erkin réhim bu heqte söz qilip “Ilkimde 500 modin artuq kéwezlik bar. Bu yerdin chiqqan paxtini satsam bu yil bir milyon som (texminen 155 ming amérika dolliri) din jiq pul tapalaymen” dégen.

Emma Uyghur diyarida biwasite tekshürüshte bolghan firansiyelik fotograf patrik wak bu heqtiki radi'o ziyaritimiz jeryanida؛ “Uyghur rayonida néfit qézish we burghilash meydanlirida ishlewatqanlar pütünley xitaylar, kéwezlikte taghar yüdüp paxta tériwatqanlar pütünley Uyghurlar iken” dégen. Shuningdek kéwezliktiki erzan bahaliq künlük paxta térishning köp qisim déhqanlarning muhim kirim menbesi bolup qalghanliqini alahide tekitligenidi.