Уйғур диярида “мол һосуллуқ пахта” нәқ мәйдан йиғини ечилди

• Мухбиримиз әзиз
  2021-10-12

Хитай һөкүмитиниң уйғур дияридики мәҗбурий әмгәк қилмиши хәлқараниң күчлүк тәнқидигә учраватқанда уйғур аптоном районлуқ даириләр 12-өктәбирдә “мол һосуллуқ пахта” нәқ мәйдан йиғини чақирған һәмдә алдин талланған алтә нәпәр пахтикарниң ағзидин “кевәзликтики һәқиқәт” темисида лексийә орунлаштурған.

Хитай башқурушидики “тәңритағ тори” ниң 12-өктәбирдики хәвиридә ейтилишичә, лопнур наһийәсиниң гүлбағ йезисидики кевәзликтә ечилған бу қетимлиқ очуқ йииғинда пахтикар деһқанлар өзлириниң кевәзликтики һекайилирини сөзлигән һәмдә пахта териштин қандақ бай болғанлиқини алаһидә гәвдиләндүргән. Шуниңдәк 2018-йилидин илгири кевәзликтә адәм күчи арқилиқ пахта теришниң давам қилғанлиқини, һазир пүтүнләй машина арқилиқ пахта йиғилидиғанлиқини тәкитлигән. Пахтикарлардин әркин реһим бу һәқтә сөз қилип “илкимдә 500 модин артуқ кевәзлик бар. Бу йәрдин чиққан пахтини сатсам бу йил бир милйон сом (тәхминән 155 миң америка доллири) дин җиқ пул тапалаймән” дегән.

Әмма уйғур диярида биваситә тәкшүрүштә болған фирансийәлик фотограф патрик вак бу һәқтики радио зияритимиз җәрянида; “уйғур районида нефит қезиш вә бурғилаш мәйданлирида ишләватқанлар пүтүнләй хитайлар, кевәзликтә тағар йүдүп пахта териватқанлар пүтүнләй уйғурлар икән” дегән. Шуниңдәк кевәзликтики әрзан баһалиқ күнлүк пахта теришниң көп қисим деһқанларниң муһим кирим мәнбәси болуп қалғанлиқини алаһидә тәкитлигәниди.