Паалийәтчиләр вә тәтқиқатчилар дунядики 82 парчә сетиш ширкитини “шинҗаң пахтиси” сетивалмаслиққа чақирған

Мухбиримиз әркин
2021.11.29

“уйғур мәҗбури әмгикигә хатимә бериш бирләшмиси” намлиқ бир хәлқаралиқ һәрикәт дунядики даңлиқ 82 парчә сетиш ширкитиниң рәһбәрлиригә хәт йезип, уларни хитайдин пахта алмаслиққа вә “шинҗаң пахтиси” ни сетивалмаслиққа вәдә беришкә чақирған.

Мәзкур мәктубта әнгилийәдики һаллам шефилд университетиниң йеқинда елан қилған “шинҗаң пахтиси” һәққидики тәтқиқат доклати нәқил кәлтүрүлүп, хәлқара пахта тиҗаритиниң хитайниң уйғурларға тутқан вәшиянә муамилиси билән зич мунасивәтлик икәнлики тәкитләнгән.

Һаллам шефилд университетиниң һелена кеннидий хәлқара адаләт мәркизи йеқинда елан қилған доклатида, хитайниң уйғур елида ишләпчиқирилған “шинҗаң пахтиси” ниң шәрқий-җәнубий асиядики бәзи дөләтләр арқилиқ давамлиқ хәлқара базарға кириватқанлиқини ашкарилап, қаттиқ ғулғула қозғиған иди. “‍уйғур мәҗбури әмгикигә хатимә бериш бирләшмиси” ниң көрситишичә, уйғур елида б д т ниң сода вә кишилик һоқуқ йетәкчи принсипиға асасән тиҗарәт қилиш мумкинсиз әһвалға кәлгән болуп, райондики һәрқандақ бир иш орниниң мәҗбурий әмгәктин хали яки әмәсликини ениқлаш мумкинчилики йоқ икән.

Мәктубта бу ширкәтләр агаһландурулуп: “ширкәтләр мәвҗут әхлақий мәсулийитидин һалқиған һалда дөләт һамийлиқидики мәҗбурий әмгәкниң давамлишишиға төһпә қошмаслиққа капаләтлик қилиши керәк. Америка, канададики, шундақла башқа җайлардики пат йеқинда болидиған чәкләшләр бу маркиларниң уйғур районидин кәлгән материялларни өз ичигә алған таварларни импорт қилишта еғир қануний вә иқтисадий ақивәткә дуч келидиғанлиқидин дерәк бериду,” дейилгән. Мәктубта бу ширкәтләрниң юқуриқи ақивәткә қелиштин бурун уйғур райони билән болған алақисини үзүши тәләп қилинған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.