Xitayning basturushi Uyghur putbolchiliqigha éghir zerbe bolghan

Muxbirimiz erkin
2018-10-15
Élxet
Pikir
Share
Print

Xitayning Uyghur rayonida bir milyondek Uyghurni yighiwélish lagérlirigha qamap, her qaysi sahelerdiki Uyghur serxillirini basturushi Uyghur putbolchiliqi saheside özining tesirini körsitishke bashlighan.

Xitay axbarat wasitilirining bildürüshiche, xitaydiki memliketlik a derijilikler putbol guruppisidiki "Tengritagh yilpizi" yéqinda ötküzülgen 26‏- nöwetlik a derijiliklerning chémpiyonluqni talishish musabiqiside xitayning jéjyang lüchéng komandisigha utturuwétip, a derijilikler guruppisidin chüshüp qalghan. 29‏-Séntebir küytün shehiride ötküzülgen musabiqide "Tengritagh yilpizi" jéjyang lüchéng komandisigha 1 ge qarshi 5 netije bilen utturup qoyghan.

"Tengritagh yilpizi" pütkül musabiqide 2 meydan utqan, 9 meydan tengliship, 15 meydan utturuwetken. "Tengritagh yilpizi"ning b derijilikler guruppisigha chüshüp qélishi xitay ijtima'iy taratqulirida ghulghula qozghighan.

Xitay top mestanilirining bu heqtiki pikirliridin melum bolushiche, "Tengritagh yilpizi" komandisining musabiqe meydanidiki turaqsiz rohiy keypiyati we chéchilangghuluqi tamashibinlargha bek tasadipiy tuyulghan.

"Béyjing géziti"ning xewiride, "Tengritagh yilpizi"ning b derijilikler guruppisigha chüshüp qélishigha ürümchidiki musabiqe meydanining küytün'ge almashturulushi, musabiqini peqet bir qanche yüzla adem körgenliki, ulargha jasaret béridighan top mestanilirining bek azliqi qatarliq amillar seweb bolghanliqini ilgiri sürgen. Lékin, bu qétimqi musabiqe xitay hökümitining ilim-pen, medeniyet, diniy, soda-iqtisad, tenterbiye, sen'et, ma'arip saheliridiki Uyghur serxillirini tutqun qilip, yighiwélish lagérlirigha qamighan yaki éghir qamaq jazalirigha höküm qilghan mezgilde ötküzülgen.

Xitay da'irilirining bu yil 2‏-ayda Uyghur putbol cholpini irfan hézimni tutqun qilip, dörbiljindiki bir yighiwélish lagérigha qamighanliqi ashkarilan'ghan. Shundaqla yene mahmutjan, ekremjan qatarliq bezi Uyghur putbol cholpanlirining tutqun qilin'ghanliqigha da'ir xewerler tarqalghan idi.

Közetküchilerning ilgiri sürüshiche, xitay hökümitining yighiwélish lagérlirini qurup, milyonlighan kishini bu lagérlargha qamishi xelq'ara sewiyege qarap tereqqiy qiliwatqan Uyghur putbolchiliqigha qattiq zerbe bolghan.

Toluq bet