Uyghurlar bilen gherbiy papu'aliqlar gollandiyede tunji nöwetlik dostluq putbol musabiqisige chüshidu

Muxbirimiz erkin
2019-10-16
Share

Muhajirettiki Uyghurlarning "Sherqiy türkistan milliy putbol komandisi" bilen muhajirettiki hindonéziyege qarashliq gherbiy papu'aliqlar komandisi 19‏-öktebir küni gollandiyening denhag shehiride tunji nöwetlik dostluq musabiqisi oynaydu. Melum bolushiche, mezkur musabiqe merkizi yawropadiki milletler, étnik guruppilar, mustemlike astidiki wakaletsiz xelqler we medeniyet rayonlirining xelq'ara putbol teshkilati bolghan "Musteqil putbol jem'iyetliri birleshmisi" ning orunlashturushida ötküzülidiken.

Mezkur xelq'ara putbol teshkilatining mes'ulliri bu yil 8‏-ayda gollandiyening denhag shehiride gherbiy papu'a putbol jem'iyiti bilen merkizi amistérdam shehiridiki "Sherqiy türkistan putbol jem'iyiti" ning mes'ulliri bilen uchriship, bu qétimqi musabiqini orunlashturghan. Bu musabiqe shu küni yawropada ötküzülidighan yawropa longqisini talishish musabiqisi bilen bir kün'ge toghra kelsimu, lékin 16‏-öktebir "Diplomat" zhurnilida élan qilin'ghan bir maqalide, denhagdiki musabiqining pewqul'adde bir musabiqe ikenliki tekitlen'gen. 

Maqalide qeyt qilinishiche, "Shu küni öz rayonliridiki kishilik hoquq éghir depsendichilikke uchrawatqan ehwalda, sherqiy türkistan we gherbiy papu'a milletliridin bolghan putbol mahirliri we mestaniliri musabiqide öz maykilirini kiyip, öz bayraqlirini lepilditish pursitige érishidiken." bu, chet'eldiki Uyghur putbol komandisining tunji qétim bir xelq'ara musteqil putbol jem'iyitining orunlashturushida bashqa bir elning muhajirettiki komandisi bilen musabiqige chüshüshidur. 

Sherqiy türkistan milliy putbol komandisining bashqurghuchisi élshat islam 16‏-öktebir taratqulargha qilghan musabiqe heqqidiki sözide, özlirining "Putbol arqiliq xelqi'alemge bizning kimlikimiz, ghayimiz, we tiz pükmes rohimizni namayan qilishni ümid qilimiz", dégen. Melum bolushiche, "Sherqiy türkistan milliy komandisi" bu yil qurulghan bolup, uninggha amérika, kanada, norwégiye, shwétsiye, gérmaniye, bélgiye, firansiye, awstraliye qatarliq döletlerdiki Uyghur putbol komandiliri eza iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet