Американиң ташқи мунасивәт алаһидә әлчиси хитайниң уйғурлар һәққидики учурларни қаттиқ қамал қилидиғанлиқини ейтқан

Америка ташқи ишлар министирлиқи хәлқара алақә мәркизиниң алаһидә әлчиси җеймес рубин (James Rubin) хитайниң һәр даим американиң яман хәвәрлирини тарқитип, хитайни махтайдиған тәшвиқатларни базарға салидиғанлиқини билдүргән; у йәнә, хитай таратқулириниң уйғурлар һәққидики хәвәрләрни қамал қилидиғанлиқини вә ислам дөләтлириниң буниңдин хәвәрсиз қалидиғанлиқини тилға алған.

“америка авази” ниң X һесабида елан қилинған бу видийода, җеймес рубин хитайниң дуняға маддий күч җәһәттинла әмәс, тәшвиқат җәһәттинму һөкүмранлиқ қилишқа алаһидә көңүл бөлидиғанлиқини вә буниң һәқиқәтән үнүмлүк болуватқанлиқини билдүргән.

У мундақ дегән: “хитай таратқулири америкада йүз бәргән бирәр җинайәт, басқунчилиқ, муһит булғиниши вә чириклик һәққидики учурларни издәп тепип, дәрһал хәвәр қилиду. Шинхуа агентлиқи хитайдики иҗабий ишларнила хәвәр қилиду, әмма хитайға пайдисиз һечқандақ бир сәлбий нәрсини бизгә билдүрмәйду”.

У йәнә хитай һөкүмитиниң уйғурлар һәққидики хәвәрләрни чәкләйдиғанлиқини тилға елип мундақ дегән: “ши җинпиң ичкий кабинет йиғинида ‛уйғурларға қилчә рәһим қилмаслиқ‚ дегән сөзни ишләткән. Хитай рәһбәрлириму бу йиғинда уйғурларға қоллинидиған усулини оттуриға қойған. Немишқа пүткүл мусулманлар дуняси уйғурлар дуч кәлгән вәһшийликни билмәйду? немишқа бу мәсилигә көңүл бөлмәйду? чүнки хитай өз услубидики тәшвиқатлирини толуқ вә үнүмлүк усулда дуняға тарқитиду. Һәқиқий әһвални хәвәр қилиштин өлгүдәк қачиду. Уйғур вәкиллириниң явропадики йиғинларға бериши вә таратқуларда гәп қилишиға җан-җәһли билән қарши туриду. Һәр дөләттики хитай әлчиханилири бундақ йиғинниң ечилишиғиму күчиниң баричә тосқунлуқ қилиду”.

У сөзини давам қилип, хитайниң хата вә ялған учур тарқитишқа дуняниң алдида икәнликини һәмдә буниңдин үнүм қазиниватқанлиқидин әпсуслинидиғанлиқини билдүргән.