Америка хәлқара диний әркинлик комитети “уйғурларни мәҗбурий әмгәккә селишниң алдини елиш қануни” ни тезрәк мақуллашни тәләп қилди

Америка хәлқара диний әркинлик комитети 29-май күни фейсбук қатарлиқ иҗтимаий таратқуларда баянат елан қилип, америка дөләт мәҗлисини “уйғурларни мәҗбурий әмгәккә селишниң алдини елиш қануни” ни тезрәк мақуллашқа чақирған.

Мәзкур органниң бу чақириқи америка авам палатаси 27-май күни “2020-йиллиқ уйғур кишилик һоқуқ қанун лайиһәси” ни мутләқ көп авазниң қоллиши билән мақуллап, президентниң имза қоюшиға сунғандин 2 күн кейин елан қилинған

Мәзкур қанун лайиһәсидә 3 милйондәк уйғурни лагерларға қамап, уларни мәҗбурий әмгәккә селишта уйғурларниң мәдәнийити, турмуш усули вә диний етиқадиға бузғунчилиқ қилишта җавабкарлиқи бар хитай әмәлдарлирини җазалаш тәләп қилинған. Америка хәлқара диний әркинлик комитетиниң баянатида йәнә америка чегра-таможна идарисиниң мәҗбури әмгәккә қарши туруш йолидики күришини алқишлайдиғанлиқини билдүргән. Америка чегра-таможна идариси йеқинда хотән “хавлин чач буюмлар ширкити” ниң чач мәһсулатлирини чәклигән иди.

Америка хәлқара диний әркинлик комитетиниң баянатида: “биз дөләт мәҗлисиниң ‛уйғурларни мәҗбурий әмгәккә селишниң алдини елиш қануни‚ мақуллап, америка истемалчилириниң хитайда мәҗбурий әмгәк билән ясалған мәһсулатларни сетивалмаслиқиға капаләтлик қилишиға чақиримиз,” дейилгән. “уйғурларни мәҗбурий әмгәккә селишниң алдини елиш қанун лайиһәси” бу йил 3-айда кеңәш вә авам палаталириға сунулған. Мәзкур қанун лайиһәси кеңәш палатасида рубийо, тед круз, авам палатисида җеймис микговерн, кристофер симислар тәрипидин сунулған иди.