Amérika xelq'ara diniy erkinlik komitéti “Uyghurlarni mejburiy emgekke sélishning aldini élish qanuni” ni tézrek maqullashni telep qildi

Amérika xelq'ara diniy erkinlik komitéti 29-may küni féysbuk qatarliq ijtima'iy taratqularda bayanat élan qilip, amérika dölet mejlisini “Uyghurlarni mejburiy emgekke sélishning aldini élish qanuni” ni tézrek maqullashqa chaqirghan.

Mezkur organning bu chaqiriqi amérika awam palatasi 27-may küni “2020-Yilliq Uyghur kishilik hoquq qanun layihesi” ni mutleq köp awazning qollishi bilen maqullap, prézidéntning imza qoyushigha sun'ghandin 2 kün kéyin élan qilin'ghan

Mezkur qanun layiheside 3 milyondek Uyghurni lagérlargha qamap, ularni mejburiy emgekke sélishta Uyghurlarning medeniyiti, turmush usuli we diniy étiqadigha buzghunchiliq qilishta jawabkarliqi bar xitay emeldarlirini jazalash telep qilin'ghan. Amérika xelq'ara diniy erkinlik komitétining bayanatida yene amérika chégra-tamozhna idarisining mejburi emgekke qarshi turush yolidiki kürishini alqishlaydighanliqini bildürgen. Amérika chégra-tamozhna idarisi yéqinda xoten “Xawlin chach buyumlar shirkiti” ning chach mehsulatlirini chekligen idi.

Amérika xelq'ara diniy erkinlik komitétining bayanatida: “Biz dölet mejlisining ‛Uyghurlarni mejburiy emgekke sélishning aldini élish qanuni‚ maqullap, amérika istémalchilirining xitayda mejburiy emgek bilen yasalghan mehsulatlarni sétiwalmasliqigha kapaletlik qilishigha chaqirimiz,” déyilgen. “Uyghurlarni mejburiy emgekke sélishning aldini élish qanun layihesi” bu yil 3-ayda kéngesh we awam palatalirigha sunulghan. Mezkur qanun layihesi kéngesh palatasida rubiyo, téd kruz, awam palatisida jéymis mikgowérn, kristofér simislar teripidin sunulghan idi.