Amérika palata ezaliri hökümetning “Uyghur mejburiy emgikining aldini élish qanuni” ni qattiq ijra qilishini telep qildi

Muxbirimiz erkin
2022.12.09

Amérika awam we kéngesh palatalirining 4 neper ezasi amérika weten bixeterlik ministirliqining ministiri alixandro mayokasqa xet yézip, “Uyghur mejburiy emgikining aldini élish qanuni” ni qattiq ijra qilishni, hökümetning yéshil énérgiye pilani Uyghurlargha qaritilghan depsendichilikni cheklesh meqsitidiki bu qanundin muhim orun'gha qoyulmasliqini telep qilghan. Melum bolushiche, “Uyghur mejburiy emgikining aldini élish qanuni” diki cheklimiler amérikaning yéshil énérgiyege köchüshi üchün muhim bolghan küntaxta bataréyesi we bashqa yéngilashqa halqiliq yéshil énérgiye eslihelirining import qilinishigha tesir körsetken.

Amérika jumhuriyetchi awam palata ezaliridin mayk gallagér, kristofér simit, shundaqla kéngesh palata ezaliridin marku rubi'o we tam katonlarning xétide, “Biz sizning ‛Uyghur mejburiy emgikining aldini élish qanuni‚ni qanun boyiche toluq ijra qilishqa, bolupmu mejburiy emgekte ishlepchiqirilghan küntaxta mesiliside toluq ijra qilishqa chaqirimiz. Bu pul paxalliqini azaytish qanunigha asasen qoshumche yardem, mukapat we baj qayturushqa érishishi mümkin” déyilgen. Yuqiriqi palata ezalirining xétide tekitlinishiche, “Amérikaliq baj tapshurghuchilarning Uyghur we musulmanlarni asas qilghan bashqa milletlerning emili rewishte qulluqqa tutulushigha qoshumche yardem bérishke yol qoyushqa bolmaydiken.”

Palata ezaliri xétide, hökümetning “Uyghur mejburiy emgikining aldini élish qanuni” ni qattiq ijra qilish, jümlidin xitayning qara tizimliktiki longji yéshil énérgiye téxnikisi shirkiti, jinko küntaxta shirkiti, trina küntaxta shirketlirige qaritamu qanunni qattiq ijra qilishni telep qilghan. Lékin amérika chégra qoghdash we tamozhna idarisining bildürüshiche, ular Uyghur mejburiy emgikige chétishliq, dep guman qilghan mehsulatlargha qarita qattiq cheklesh tedbirlirini qollanmaqtiken. Amérika tamozhnisi özlirining 728 milyon dollarliq xitay éksport mehsulatini Uyghur mejburiy emgikige chétishliq, dégen guman bilen tutup qalghanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.