Mutexessisler amérika shirketlirini “Uyghur mejburiy emgikini cheklesh qanuni” boyiche heriket qilishqa chaqirdi

Muxbirimiz irade
2021.12.30
Share on WhatsApp
Share on WhatsApp

Amérika prézidénti jo baydén 2021-yili 12-ayning 23-küni “Uyghur mejburiy emgikining aldini élish qanuni” ni resmiy imzalighan idi. Mutexessisler emdi amérikaning xelq'araliq shirketlirini derhal bu qanun'gha asasen heriket qilishqa chaqirmaqta.

Amérikaning tijaret we qanun sahesidiki adwokatlarning tetqiqat tor béti “jdsupra” tor bétide bu heqte mexsus xewer élan qilindi. Uningda mejburiy emgek arqiliq ishlepchiqirilghan tawarlarning amérikagha kirmeslikige kapaletlik qilishni meqset qilidighan bu qanun netijiside amérika tamozhna we chégra qoghdash idarisining shinjang Uyghur aptonom rayoni (XUAR) da ishlepchiqirilghan barliq tawarlarni mejburiy emgek bilen yasalghan, dep perez qilip turup ularni tosidighanliqini, cheklimining yene töwendiki sahelernimu öz ichige alidighanliqini bildürgen. Bular: Uyghur rayonida toluq yaki qismen qézish élip baridighan, ishlepchiqiridighan yaki qurashturidighan orunlar, shinjang rayonluq hökümet bilen xizmetchi qobul qilish, toshush, yötkesh, port yaki mejburiy emgekke qobul qilish heqqide toxtamlashqanlar, aldinqi maddilardiki shertler astida qéziwélin'ghan, ishlepchiqirilghan mehsulatlarni éksport qilidighan orunlar, teminlesh zenjiri üchün Uyghur rayonluq hökümet yaki shinjang ishlepchiqirish qurulush bingtu'eni da'iriliri bilen hemkarlashqan orun we esliheler qatarliqlarni öz ichige alidiken.

Yuqiridiki bu maqalida amérika shirketlirining derhal bu qanun'gha estayidilliq bilen mu'amile qilip, bu yéngi qa'idige asasen heriket qilishi kérekliki we shuninggha maslishidighan istratégiye belgilep chiqishi kérekliki eskertilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet