Американиң «2020-йиллиқ истихбарат хизмәтлирини әмәлийләштүрүш» һәққидики қанун лайиһәсидә уйғурларға мунасивәтлик маддиларму орун алди

Мухбиримиз ирадә
2019-07-04
Елхәт
Пикир
Share
Принт

Америка авам палатасиниң әзаси вә шундақла авам палата истихбарат комитетиниң башлиқи адам шиф тәрипидин тонуштурулған «2020-йиллиқ истихбарат хизмәтлирини әмәлийләштүрүш» һәққидики қанун лайиһәсидә уйғурларға мунасивәтлик маддиларму орун алди.

Америка дөләт мәҗлисиниң тор бетигә қоюлған мәзкур қанун лайиһәсидин мәлум болушичә, мәзкур қанунниң 5-баб 2-маддиси «хитай һөкүмитиниң шинҗаң уйғур аптоном районидики мусулман милләтләргә қиливатқан бесими һәққидә доклат» дәп аталған.

Униңда мәзкур қанун күчкә игә болғандин тартип 150 күнгичә болған арилиқта америка дөләтлик истихбарат идарисиниң авам палата истихбарат комитетидин хитай һөкүмитиниң уйғур районида йүргүзүватқан бесим сиясәтлири үстидә мәхсус доклат билән тәминлиши керәклики тәкитләнгән.

Қанун лайиһисидә ейтилишичә, комитетқа йоллинидиған доклатта хитай һөкүмити уйғур елидә йолға қойған «қайта тәрбийә лагерлири» да тутуп турулуватқан кишиләрниң сани, лагерларниң шараитлири, бу лагерларда йүз бериватқан қейин-қистақ, диндин мәҗбурий тандуруш вә шуниңдәк башқа начар муамилиләр һәққидики тәпсилий учурлар, лагерларниң ениқ җуғрапийәлик орни, лагерларда «қайта тәрбийә» үчүн қоллиниливатқан методлар вә шундақла бу лагерларда мәҗбурий әмгәк йолға қоюлуватқанлиқи һәққидики дәлил-испат қатарлиқлар мәлум қилиниши керәк икән.

Мәзкур доклат йәнә хитай һөкүмитиниң чәтәллик зиярәтчиләрниң лагерларни тәкшүрүшигә чәклимә қоюватқанлиқиға даир мәлуматларни һәм шундақла уйғур райони миқясида йолға қоюлуватқан юқири техникилиқ назарәт вә тәқиб системилири вә контрол механизимлириға аит мәзмунларниму өз ичигә алидикән.

Юқириқи бу қанун лайиһәсиниң тонуштурғучиси болған адам шиф америка авам палатасиниң әзаси вә шундақла авам палатаси истихбарат комитетиниң рәиси. У техи йеқинда «сан-франсиско һадисилири гезити» дә мақалә елан қилип, трамп һөкүмитиниң «йәр шари магнетиский қануни» ни ишқа селип уйғурларниң кишилик һоқуқини дәпсәндә қилишта җавабкарлиқи бар хитай әмәлдарлириға җаза тәдбирлирини йүргүзүши керәкликини билдүргән иди.

Мәлум болушичә, бу америка дөләт мәҗлисидики уйғурларға мунасивәтлик 3-қанун болуп һесаблинидикән.

Пикирләр (0)
Share
Толуқ бәт